Ма хоза Ӏан сайре я ара латтар! Нани пешка юхе пазаташ еш ягӀа тхах. ЗӀамига Iаьла цунна гонахьа кхесташ, кара хувшаш, даь-нанас леладеча хӀаманца чIоагIа сакъердалуш ва. Пхи шу даьнна Ӏаьла чIоагIа тIера ва йоккхача сага, из мел йодача, цун тӀехьа лел из. Котамашта кӀа тоссаш, жена хьажкӀаш луш, цӀе етт Зорька бийтта нани хьачуеча, цун шуралуттарг хьалоацаш, цӀагӀа диса ялаташ цӀен тӀехьашка лелача боабашкашта дӀатовса водаш, новкъостал лоаттаду цо. Да, нана Ӏуйран балха дӀадода, хӀаьта Ӏаьла сарралца ший бочача даь-нанна, даь-даьна тӀехьаваьнна лел. 

Жуврах хьовла де лаьрхӀар нане тахан, сагӀийна лургдолаш, цунца йӀайха маькх а еттар. ЧӀоагӀа гӀадвахар Ӏаьла, хӀана аьлча сагӀийна лоалахошта хӀама яла ухаш дола гӀулакх дукха дезар цунна. 

- Нани, со а воалл хьоца мажаргаш хьаде, со мара хьона новкъостал де саг мичав укхаза, тӀаккха дика деций хьона со волаш? - йоах цо даь наьнага. - Ай, даькъала хила са кӀаьнк, мишта дац сона хьо волаш дика, хьо-м са дошо дог ма дий, хьо вецаре сога вӀалла йиш а мича яр! - йоах виӀий-воӀ мархӀахьерчавеча нане. Ше коанаӀарга дӀа а этта, Ӏаьла дӀачувахийтар цо лоалахошта сагӀа дала. Цхьан коара ваьлча, вокх коа водаш, шийна тӀадиллача гӀулакхах доаккхал деш, из кхоачашдеш ва зӀамига Ӏаьла. 

- Ший тайпара-м даьра хул боккхача нахаца кхийна бер. Ма башха кӀаьнк а ва-кх, воккхача сага санна хьаькъал дӀакхоачаш! Дала эзар волва хьох, АллахӀа беркат совдоаккхалда хьо иштта кхеверашта а, - яхаш латт урам тӀара цхьа кхалсаг. СагӀа хилда хьа, Ӏаьла аьлча; гӀоза дуалда оаш, хьаьнала а хилда, яхаш, юхакхайк кӀаьнк царгахьа. Ма безаме сурт а дар-кх хьо!