БIарчча дийнахьа гIайгIане лелар со.  Цун ший бахьан дар... ХьатIакхоачаш латташ зIамагIа йола йиша яь ди дар, хIаьта сога цунна дIадала совгIат дацар.

Марема-м сох бехк боаккхаргбацар. Баккха ховрг а дацар цунна, хIана аьлча хIанз а пхи шу мара даьннадац цун.

Iохьежача лоалахой кIаьнк Манчук вайра сона, наIарга техача гIанда тIа вагIаш. IотIавахача сона, дIахотекха, моттиг мукъаялийтар цо.

- Фу даьд хьона? - хаьттар цо.

- ХIама-м даьдац, - аьлар аз халла.

- Маьлхара хIанав хьо хIаьта? 

- А-а, дош дацар из-м, - къамаьл кхыча апарах дIадерзаде хьежар со.

- Хьаалал Iа сога. Аз къоастадергда хьона дош да из е дац.

- Марем яь ди да...

- Дика да-кх тIаккха, совгIат дала деза.

- Ахча-м дац сога, - корта чубахар са.

- ТIаккха... Вешта, хьавел соца, - шоай коа чуволавелар лоалахо.

ДIачуваьннача уллар бохкабенна хиларах дIабаьккха зIанара бIоагIа. Цаховш дIахьокхавелча, мур Iойодар цох. Цхьан бухьера хьалдагIар цIе, сийна, мора, баьццара беса дола аьшкасаьргаш.

- ГIоз бергба вай цунна, - аьлар Манчука. Хьаозадир цо уж тамашийна хоза саьргаш. Дукха ха ялале, са эггара зIамагIа болча пIелга тIа буста а бусташ,  гIоз хьабе хайра из. Са цIазапIелги Марема нанапIелги цхьатарра сомал долаш бар. ГIоз хоза хилар. Сайна бита а догьэттадар са цкъарчоа. Юха а цун яь ди хилар дагадеха, дIабелар йишийна. Со чукхаьчача, из чай молаш ягIар. 

- Хьажал, аз хьона дена совгIат, - аьлар аз.

ГIадъяхар йиIиг. Безабелар цунна гIоз. 

- Кхы бий хьога? - хаьттар Марема.

- Ба, - аьлар аз. - Из хьатIадоагIача шера лургба аз хьона. Цунга из а аьнна, се Манчук волча вахар со.