- Мама… мама… телефон етт хьога… – цӀогӀа тох уйчен тIа ловзаш ягӀача Фаридас.

- Хьаял сона из, - оал, истола тӀа а этта, цӀагӀа кӀир тохаш йоаллача нанас. СихагӀа йистеяла гӀертача цунна ха йоае лацар. Фаридас сихха ураийккхе, хӀам дуача цӀагӀа истола тӀа улла телефон наьнага дӀалу. Ше къамаьл даь яьлча, нанас телефон Фаридайга дӀакховдаю: 

– Йолле… Ӏойилла, - аьле. 

Фарида, телефон бе а йоаллаш, къайлайоал. Цхьа ха яьлча, Ӏоухача хин тата хоз нанна. 

- Фарида! Фарида! - цӀогӀа тох нанас. ЙиӀиг юхайистхиланзар… Ялх шу даьннадале а, йиӀиг бӀарглакха безаш яр…

- ХӀанз фу деш йоалл-хьогӀ ер? – аьле, нана истола тӀара Ӏо а яьле, хин тата долчахьа йод.

БӀаргадайнача сурто меттагI ца йоалийташ ют нана… 

Ноанал деча цӀагӀарча крана кӀал, гӀанда тӀа а этта, шин кулгаца сапа а хьокхаш, дуккха хий ӀотӀа а ухийташ, телефон юлаш йоаллар Фарида. 

- Ай! Ай! - яхаш, йиӀигагара телефон хьайоаккх нанас. - Ай, хьан аьннад хьога телефон йила?

- Мама… Ӏа ма аьларий сога: «Йолле, телефон Ӏайилла»… - нанас леладечох ца кхеташ, цецъяьнна нанна бӀарахьеж Фарида.

- Бакълув йиӀиг, - оал сесага а йоӀа а деш дола къамаьл хозаш, цӀагӀа чуваьннача дас. - Ӏойилла аьннад, цо йилай… Ӏо мичахьа йила еза аьннадаларе, цо дӀаюлларгьяр, – аьле, велалу из.

- Сен раьза яц хьо? Ӏа аьннар хьадаьд укхо, – яхаш, йиӀиг мархIа а елла, хьоаст дас, - цӀена бувца беза гӀалгӀай мотт.