Кхо шу хьалха дар из. ЗIамига циска кIориг доаладаьдар Мусас. ЧIоагIа боча дар  берий цискилг. Кара хувшадеш хIама хьокхар, шоашца метта Iодужадора.  Муса дIатхьовсалца цунца дижа а илле, уйча Iочудодар из. Дивана юхе, кIувса тIа Iодужаргдар.Уйча мара Iодижа тугаш цахиларах, Iийсас ийчарвар, аьнна, цIи тиллар  цунах. Лоацца аьлча «Ичора» хилар цох. 

ЧIоагIа тамашийна цискилг дар Ичора. Лосттаяь хьачукхесса хIама санна, дийлла латтача корах хьачудожаргдар цIагIа.  Дукха, хоза оамалаш йоахкар «Ичорах». 

Шийлача Iай наIарга цIувзаш дагIа цхьаькха цискилг чудитар дас. Iа дIадаьлча дIагIоргда ер, аьнна. ХIаьта из, аьрдагIа оамалаш йолаш циск дар. 

Нанас эккхадича а, юха чудоагIар из. 

Цхьан дийнахьа  геттара а чураяьлар нана. КIордадаьдар цунна из аьрдагIа циск.  Миска «Ичора» а дитацар цо. Цудухьа  «дIадаккха ер синнел укх цIагIара» - яхаш цIогIа деттар нанас,  ше човхадаьча циска тIехьа. 

Балха водача дас аьлар: 

- Даьра, доаккхаргда шаккхе а-м. Хьои ер  цискаши кIордадаьд укх чу. Воллел Муса, хьалацал уж ши циск. Хьо  балха волча дутаргда вай ераш. «Ичора» хьалаьцар кIаьнка, вож  цIогIах кхераденна къайладаьннадар. Бакъда городе юкъе йоаллача гIарага Iема доаца циск; кхераденна, бера Iо а ийккха дедар. 

ЦIаьхха, шелал эттар цу деношка. ЧIоагIа дагадоаллар нанайна циск. ХIара ламаза тIехьа дуIанца дехар из хьакорадар. 

ДиълагIа ди дар циск цIагIа доаца. Интернете  чугIолла лохаш дар циск. Iийсас дика мах а оттабаьбар хьалехачоа. Наьсаре дуккха го а баьха, цIаера нана. Хургда аьнна мел хийттача хьежаяр. Дацар циск. 

КIолдаш йохкача кхалсага, сайран дулх дохкача тика юхе хьагуллу дуккха цискаш  аьлар, царна юкъе дий хьажа. Цу метте да дIа-хьа ухаш шун цIагIара саг вале, хьажах ше хьатIадоагIаргда шо долча. 

ИйслагIа ди дар. Делкъел тIехьагIа тIорме чу котлеташ а дехка, доацаш йоагIаргьяц ше аьнна, Iайнайца гIалий тIа яхар нана. Хьалха санна дуккха гобаьккхача кораданзар. Баьдлуш латтар ара. 

Машинаш латтача мугIарга хьежар нана. «Ичора» аьле кхайкар. Машинашта юкъегIолла урадагIаш циска цIог гора. ДIа да, аьнна, цIогIа техар нанас. Ше ма доаггIа Iайнайна тIатоссаделар из. Ший дегIа лакхал мел да тувсалора гIадъяха йиIиг. Телефон теха сиха хьавийхар нанас Муса. ТIеххьара йоагIача машинаца цIаухар из. ЦIакхаччалца Мусай карара Iодаланзар циск. ЧIоагIа гIелделча санна хетар нанайна из. 

Чукхаьчача, тхьайса уллача Iийсайх дIа а хьокхаш, юххе Iодиллар. Набарах воаллача кIаьнка тоIIадаь мархIаделлар шоай циск. Елар а елхар а цхьана дар, сов гIадъяхача наьна. Ма чIоагIа бар царна юкъера безам! Цу ийс дийнахьа юачох мотт ца тохаш, деша водар Iийса, чувеча ца юаш Iовужар.