Гуйре. Каст-каста делхача догӀаша чӀоагӀа Ӏаьрждаьдар Тирка чура хий. Ӏаьдала Ӏажий бешара сом кхаьча а гулбаь а баьннабар. ХIаьта а юкъ-юкъе лаьтта бадаш гора Ӏажаши кхораши. Шоай коа сомий гаьнаш ягӀе а, цу йоккхача Ӏажий беша аха чам хулар берий. Буро магӀа баьхачарна дика дагайоагӀаш хургья из беш.

Иштта цхьан дийнахьа йӀайха хӀамаш тӀа а йийха, ловза бахар Заретхани  Ӏалихани. ЙиӀиг пхи шу, кӀаьнк кхо шу даьнна бар уж. Ала деза, цар да вар цу беша ха деш. Бакъда цу юкъа ламаз де чувахавар Хьусен. Ӏажий беш кхоачалучча берд бар. Цу берда йистегӀолла додар Тирк. Сомача саьргех яь, йийца карт латтар бердаца. ОагӀораяьнна уллар карт. Цу карта тӀа ӀотӀа а вижа, теркаш уллар Ӏалихан. Заретхан лелар герга кхерий лохьадеш. ЦӀаьхха, теркаш илла кӀаьнк, картал тӀех а ваха, хи чу вежар. Масса дар Тирк.

- Ва са Даьла!  Ва са Даьла! – яхаш цӀогӀа деттар йиӀига. – Ӏалихан Ӏохьош латт! Ва са Даьла! Цу цӀогӀо оарцагӀбаьха, удаш боагӀар доахан доажадеш баьхка юртара кӀаьнкаш. Ялх шу даьнна вола Ӏумар, шийна тӀера иккаши партаьнкаши Ӏо а кхайса, ше ма водда Тирка чу тоссавелар. Оарц даккха яха йиӀиг, ший даи йижарийи боалабеш йоагӀар. Уж хьакхаьчача хана, Ӏумара мархӀавоаллар кӀаьнк. Ше воккха веце а, майра вар Ӏумар…

Дала могаш-маьрша лелаволва хьо, Ӏумар! Хьона тара а болаш, дуккха кагий нах кхувлба гӀалгӀай.