Цхьан хана, вахаш дийша саг хиннав. Цун воI хиннав чIоагIа илли  алара тIера. Оаз селлара дика еце а, Iура денз сарралца доахаш, цIогIа детташ хиннад ший оаз мелий. Лоаллаха бахача наха чIоагIа новкъа хиннад цун цIогIа. Кхы из кIорда а ваь, вIашагIкхийтта, из волча бахаб уж.

– Ай, ва Мовла, ма кIордаваьв тхона из. Иззал дукха даха мегаргдий иллеш, хьа воIа миссел? Тхо латкъа гIоргда, тхона кIордаваьв из а цун цIогIа а.

– Иштта дале, шух хIаране коа цхьацца е шишша жIали да,– аьннад раьза воацача Мовлас. – Уж Iех, Iура денз сарралца, IувгI, сайрийна денз Iурралца. Аз хIама мича оал! Са цаI мара воI вац, цун оаз а ла магац шоана? ТIаккха са виIий оаз вогI я, шун жIалейчарел?