Цхьан бIаьстан дийнахьа, шоашта юххе йоаллача тика тIа яха, йоагIар Ясмина ший наьнаца. Наькъа йистегIолла хьалъягIача йокъаеннача баьцашта юкъе цхьа хIама зийра йиIига.

- Мама, хьажал: циск, циск! - яхаш, геттара цунна гIадъяха, ший зIамига кулг дIакховдадир йиIига.

- ДIаяла, кулг ма тохалахь цох! БIеха да хьона из, лазар лоацаргда Iа, - аьлар нанас.

- ХIаа, сона циск деза, бат эза, елха чIехкар йиIиг.

- Дика да, хьа да чувеча, цунга хатта а хаьтта, из раьза хуле, воашта чухьоргда вай из,- аьлар нанас.

Геттара гIадъяха, елаелар даьлар Ясминайга.

- Мегаргда,- аьлар цо, из ше чудахьаргдолга тешаме хеташ.

Из деррига  дIахезача санна, терка а теркаш, шортта акхарна тIехьа доладелар чоажош чукхийтта дола циск.

ЧIоагIа хьийжар йиIиг да чуварга, корага ягIаш. Юххера а, наIарга когий таташ хеза, едда духьалъяхар из.

- Папа. Циска кIориг я цига ара, сона еза из чIоагIа, хьачуйоалае мегаргйий аз из? - хаьттар Ясминас.

- ЧIоагIа еза хьона из? - вела а венна, юхахаьттар дас.

- Еза, - аьнна, даьна мархIаийккхар йиIиг. - Мегаргйий? - цIаькха хаьттар.

- Мегаргья, - аьлар дас. - Цкъарчоа, дикка лувча а яь, цIенъе еза из.

Циска кIориг  хьачу а йоалаяь, цискашта лаьрхIа йола шампунь а ийца, из лувча а яь, цIагIа дIахийцар цар.

ДIаьха хиланзар Ясминай гIадъяхар; кIориг, цIаьхха, елар. ГIайгIанга яхар йиIиг, саготдора цо циска кIорига. Цхьаннахьа саьн чу Iо а хайя, кхыметтел хIама ца дуаш, ягIаш хулар из.

- Сона циск деза, - оалар цо; фу даьд, аьнна, шийга хаьттача. Юххера, цхьан дийнахьа, ниI дIайийлла, йиIиг араяьлча, наIара тIехьашка дагIаш дайра цунна, дерста эккха доаллаш, вокх кIоригал кIеззига доккхагIа хургдолаш, циска кIориг. - Циск чуденад, циск чуденад, - аьнна, гIадъяха, цунна дIатIаяхар йиIиг.

Хийра латтача наIарах, ше цIагIа чуийккхар из. Иштта юха циск хилар, пхи шу даьннача Ясминайга. Ший ханнахьа хIама луш, лувчадеш, дика доал ду йиIига кIорига.