Шоана цогилг дувцаш,

Бувца воалл со фаьлг.

Дошо долаш санна,

Сацац цун тӀа бӀарг.

Малх ба сийрда хьежаш,

Леп цун хӀара чо.

Дац из цхьаннех дашаш,

Яхаш да из «со».

Шийх хет цунна аьла,

Массанех хет лай.

ЦаӀ хиннаб цар овла,

ЦаӀаш хиннаб дай.

Рузкъо толхадаьд из,

Сонтадаьккха дог,

Да из доккха Ӏовдал,

Харцахьа лувз ког.

Цогалий садуъ цо,

Бувцаш лира тӀом:

«Сона эшаш дац шо,

Са доттагӀа - лом».

Майда  йолча даьхка,

Цогеша бу барт,

Шоашта гаьнадаккха,

Йохаяь цун бат.

Наькъа додаш цунна,

БӀаргадайра лом.

Дар из тхьайса уллаш,

Когех боаллаш дом.

Ломо, раьза доацаш, 

Техар цунна тӀод.

ТӀера мос дӀаяхар,

Техача мо кӀод.

Дедар тӀаккха цогилг,

Ӏачуделла цӀог, 

Масса додар, лаьтта

Ӏо ца отташ ког.

ТӀаккха аьлар цоге

Са доттагӀа – борз.

Ломал майрагӀа хул из,

Ӏочумелча морз.

Довзаш да цун денал,

Массар ду цун сий -

Берза дора тешал,

ДоттагӀа хеташ ший.

Цунца къоала ухаш,

Доадеш дерста жа,

Цунца думий буаш,

Йоаккхаргья аз ха.

Уйла ешше, ког ший

Гон тӀа баккха отт,

Долалу из кура

Батах хьекха мотт.

Бози йоагӀаш яйна,

Хьесталуш цо дувц,

Духьалдода цунна,

Берза хьалха сувц.

«Хозий хьона бозий…» -

Алалехь кхы дош,

Борз тӀакхийтар цунна,

Аьгар цоге гош.

Корчадир из хоттал,

Толхабир цун бекх.

Сонтал дагайоацаш,

Цогал новкъа текх.

Дедар тӀаккха цоги,

ЖӀалеш тӀехьауд;

Халла кӀалхардаьлар,

Шийна ялехь суд.

Довзаш дац из царна,

Кхолха го баьб цар,

ТӀехкаш ека яьлар,

Кагдеш санна зӀар.

Цогилг дагӀа делхаш,

БӀаргех Ӏоух хий…

Хьайчар лоархӀаш веце,

Халахь, дайнад сий.