Цхьаннахьа гаьнна лоамашта дехьа, я Фура-фаьлг яха шахьар. Цу шахьар тӀа дахаш да тамашийна оакхарий. Цу оакхарех цхьайолча хана боамбе ловзоргаш хьахулаш, тӀаккха юха дийнлуш хиннад. Иштта тамашийна хиннад уж.

Цу шахьаре дахаш хиннад цогал. Из цогал арадаьннад ший къорга чура саготалла. ДогӀа хиннад ӀотӀадоагӀаш. ТӀоадабаь бекх болаш, додаш хиннад из, наькъ тӀа даьнна. ВӀалла ца соцаш, машинаш лелаш хиннай цу наькъ тӀагӀолла. «Вай, хӀанз со дехьа мишта дала деза-те?» - хийттад  цунна.

Латташ, кхо бӀарг болаш хӀама яйнай цунна. ДӀатӀадаха хаьттад цо: «Хьааргдацар Ӏа, тӀех мишта дала деза укх наькъа?» Из хӀама йистхулаш яцар. БӀаргаш дар цун доагаш. Цкъа цӀе бос хьаллоталора, тӀаккха ӀажагӀа, тӀехьа баьццара бос хулар. Кхы из йист ца хинна, наькъ тӀа дӀатӀадаьнна, машин тӀатохачара яьлар цунна.

Мичара дера ца ховш, сигаларча аьрзе хьалаьца, лаккха хьалдихьа, цогал Ӏохеца безам хиннабар цун, хӀаьта а Ӏохецанзар цо из. Аьрзе дӀадихьар цогал ший бӀы болча. Аьрзе бӀена чу ягӀар меца йолаш ши кӀориг. Из бӀаргадайча; цогал, кхераденна, Ӏодийлхар: «Ма даалахь со, зӀамига кӀоригаш я са», - аьнна.

Аьрзи ладувгӀа безам болаш яцар. «Со аьрзей инспектор я; наькъ тӀа мел доаллар бӀаргагу сона. Дехьадала йиш йоацача метте, дехьадала доалларий хьо? Цудухьа…» - оаллашехь, Ӏочукхессар аьрзе ший кӀоригашта цогал. Кхераденна, боамбе ловзорг хьахилар цох.  КӀоригаша дӀааракхессар из бӀена чура.

Лаьтта Ӏодежача, юха цогал хьахилар цох. ТӀаккха Ӏомае доладелар бокъонаш. Светофор фуй хайра цунна. ЦӀе бос боагача хана, тӀехдала йиш йоацилга хайра цунна, ӀажагӀа бос «сабар» яхилга, баьццара бос боагаш бӀаргабайча – «дӀагӀо» яхилга. ТӀаккха тӀехдала моттиг, кӀай шувнаш ухаш, хул. Деррига шийна хайначул тӀехьагӀа, ший кӀоригашта дӀахьийхар цогало, наькъ тӀа лелара бокъонаш.