Цогал  чудежа хиннад гIувча,  хьалдала низ ца кхоачаш, цу чу даьгIад из.  Хьогьенна йоагIа бодж гIувна тIаяхай. Цу чу дагIа цогал дайча, хин чам миштаб, хаьттад цо. Ший аьттув баьнна хиларах тийшача цогало, геттара чIоагIа хоастадаьд хий, цул тIехьагIа  бежга IокIалъялар дийхад. Хьогало хьувзаю бодж, Iочукхоссаеннай гIувча, йиззалца хий менначул тIехьагIа, цогалца уйла е хайнай, шоаш цу чура хьал мишта даргда дувцаш. Цогало аьннад, шийна дика уйла керта чу енай,  шаккха а кIалхардаргдолаш:

- Хьалхара ши ког пенах дIа а гIортабийя, тIаьнаш тIа оттал, корта чу а бахийте.  Хьа букъ тIагIолла урагIъяха, аз хьалйоаккхаргья хьо.

Шийга яхачунга ладийгIад бежо.  Цун букъ тIагIолла урагIдаха,  муIаш тIара хьалъарадаьннад говза цогал,  тIаккха йорт йихьай.

Йолаеннай бодж тешаме доацача цогала яппараш е, хIаьта юхадийрзача цогало аьннад:

- Дала дIаяккха хьо! Хьай межах доахка чош миссел, хьа керта чу хьаькъал хиннадаларе, Iочу а ялалехь уйла ергьяр Iа, гIув чура ара мишта яргья.

Цох тарра, хьаькъал долаш волча сага а уйла е еза, ше моллагIа гIулакх дIадоладеш, бухсоццаш цох фу хургда.