Аьрзеи цогалои бартчIоагIам баьб, юхе даха а доттагIал кхы тIа чIоагIде а. Аьрзе ший бIы беллаб лакхача хена тIа, хIаьта цогала цу гаьна кIалха, кIотаргашта юкъе, кIоригаш яьй. Цкъа цогал шийна фос лаха арадаьннача хана, мецъеннача аьрзе, IокIал а яьнна, цун кIоригаш ена, уж ший аьрзелгашца цхьана йиай. ЦIаденача цогало цу сахьате кхетадаьд хиннар. Ше пхьа леха низ ца кхоачаш дисарах, йоккха гIайгIа кхаьчай цунга: аькханна дегIадац оалхазараш лувца. Гаьннара цунна сардамаш дахар мара, де хIама дисадац цогала, кхы фу дергда цо оарцагIвала новкъост а  низ а ца хилча? Бакъда, дукха ца говш, доттагIалах бола тешам боабаьча аьрзена бекхам хиннаб. Малав ца ховча сага цIер тIа ятта йилла хиннай, сагIийна йийна газа. IотIаяхача аьрзе, йоагаш латта цун чураш енай. Ший бIена чу цо уж чухьошше, чIоагIа мух баларах, цIи геттара михьаръяьннай. БIена даьхка къаьна, декъа саьргаш цу сахьате лотаденнад, даьгад. ЦIеро йоагаяь аьрзе кIоригаш лаьтта лийгай, хIанз а гIовтта Iомаенна хиннаяц уж. Цигга тIаденача цогала, аьрзена а гуш, уж ерригаш дIайиай.

КIоанолго яхачох, Iа тийшаболх баьча доттагIчун кхелах кIалхарвоале а, амма Даьла кхелах кIалхарвала йиш яц.