МоллагIча  сага  а цун керта мосий а, бос белгалбу дош да из. Масала, Iаьржа мос а йолаш, хьатара юхьмараш йолча сагах ала йиш я; Iаьржа бIармат долаш ва из, аьнна. ХIаьта цун мосаш кера а йолаш, юхь-сибат сийрда долаш  хилча, цунга хьежжа, кера е сийрда бIармат долаш ва ала деза. Наггахьа нийслу бора бос бола мосаш йола саг. Цох, бора бIармат дола саг, ала деза.

Ха яьнна къоаночох, из къона волаш цун мосаш Iаьржа е кхыбола бос болаш  хиннаяле а,  цун бIаргцIацкъамаш а тIехьа кIайделча, кIай бIармат да цун, ала йиш я. Укхаза белгалде деза, вай йоазонхоех цхьанне а  шоай йоазошка из дош хьоахадаь цахилар. Цхьабакъда вай къоаноша наггахьа оалаш дар, кхыметтел масал доаладора цар, цхьан йоIага жайна хьежача сага «Iаьржа бIармат долаш, лакхача дегIара волча сагага маьрел дергда Iа»,  аьнна хиннад яхаш.

БIармат  яха дош  бIаргашца а  цIацкъамашца а  бувзам болаш да,  дистмат яхар  бордашца дувзаденна хилар санна.