Цхьа да хиннав, ший воIа саг йоалае гIерташ. Шийга дас йоалае яхача йоIа раьза хиннавац воI. Иштта из къовсам а болаш уж лелача хана; да, цамогаш а хинна, вежав. Унахочунга хьажа нах ухаш хиннаб. Фу дуаргда Iа, фу деза хьона, аьлча; цхьаккха а хIама дезац, дуача хIаманца чам бац ший, оалаш хиннад цо.

Цхьан Iуйрийна воIага аьннад дас:

- Сийсара гIа дайра сона, маькх еча оаркхо чу юхебиса боалла миста бод биа се тоавенна. Iа сона из бахьаре, тоалургвар со.

Удаш вахав воI, дас шийна йоалаергья яха йоI йолча. Ше бена никъ цо дIабийцача, йоIа аьннад цунга:

- Оаха-м, тхоай гIулакх даьлча, дила а диле хьалъолл оаркхув, тха оаркхох-м баллац хьона миста бод.

Удаш вахав из, ше догдоаха йоI йолча. Цига цо ше бена никъ дIабийцача, йоIа жоп деннад:

- Укхаза ба бод-м, мел беза а, цхьабакъда диг ца дахье, ахбаккха хала хургболаш, чIоагIа ба из.

Миста бод бахьаш ше цIагIа хьачувоаллашехь, аьннад воIа даьга:

- Iа-м сога ма йоалае ма яхарий аз догдоаха йоI, хьо сона йоалае гIертар йолча со вахача, царцига ба а боацаш, аз догдоахача йоIа белар сона ер бод.

- Цудухьа яхар аз хьога из ма йоалае, - аьнна, хьалгIеттав, ше цамогаш воаццашехь, вижа илла да.

ТIаккха кхетадаьд воIа а, из йоалае мегаргйоацилга. Дас йийца йоI а йоалаяь, ваха хайнав воккхача сага воI.