Кицаш
Моаршал дувхарга хьежжа хатта, накъа хьаькъалга хьежжа ваккха.
Саг везвер цун цӀи яц, цӀи езъер из саг ва.
Саг дика вовз, Ӏа цунца дукха сискал йиаяле.
ЦӀенавар цӀеро а воагавуц, бӀехавар хиво а цӀенвуц.
Зизашта аре еза, адамашта паргӀато еза.
КӀоанолг
Ломи, Прометейи, пиллеи
Лом Прометейга латкъаш хиннад: цо ше доккха, куц долаш, бага ира царгаш, когаш тIа унзара мIараш йолаш, оакхарашта юкъе низ болаш кхолларах.
- Амма, - оалаш хиннад цо дIахо, - иштта доллаше а боргIалах кхераш да-кха со.
Прометейс цунна духьала аьннад:
- Зехьа латкъ хьо сона! Сай низ дIа мел кхоачаш дола хIама аз хьона деннад; хьа дог сов кIаьда хилар да хьох дахар.
Ший кхела раьза доацаш, сов зовза хиларах саготдеш, юххера шийна теха дала лаьрхIад ломо. Цун уйла еш новкъа гIолла доагIаш, пилла кхийттад цох, фуд-малад хаьтта, дахар-денар дувца эттад ераш шиъ. Даим лергаш хьедеш дола пилла зийча, ломо хаьттад:
- Фу даьд хьона, уж лергаш даим хьувш хIанад хьа?
Цу хана пиллан тIагIолла гобоахаш лелаш хиннаб чIиркх оала мозилг.
- Гой хьона, - аьннад пилло, - из дIара «зув», яхаш, лела паькъарг? Лоацца аьлча, из лерга чу боде, со лергда.
ГIаддахад из хеза лом:
- МалагIча гIулакха леш да со? Со-м ираз долаш ма хиннадий, цу зIамигача мозилга юхе боргIал миссел!
ДIахьажал хьо: мел низ болаш ба мозилг, нагахьа санна пилла а цох кхераш дале!
Таржам даьр Iарчакханаькъан Сали.