Кицаш
Моаршал дувхарга хьежжа хатта, накъа хьаькъалга хьежжа ваккха.
Саг везвер цун цӀи яц, цӀи езъер из саг ва.
Саг дика вовз, Ӏа цунца дукха сискал йиаяле.
ЦӀенавар цӀеро а воагавуц, бӀехавар хиво а цӀенвуц.
Зизашта аре еза, адамашта паргӀато еза.
Халкъа багахбувцам
ИбрахIима говзал
Цхьан хана жаIуй болча хьоашалгIа водаш хиннав ираз дола ИбрахIим. Наькъ тIа латаш боаллаш кIайи Iаьржеи ши бIехал хиннаб. Цхьаннена шод теха, цIога духьиг даьккхад ИбрахIима. ХIаьта ужаш хиннад ши жин - цаI керастеи вож бусалбеи.
ЖаIуй болча фусаме чувахав ИбрахIим. Цига хиннад из цIога духьиг даьккха жин, цIазапIелг баьккха хиннад из. УстагIа бийнаб ИбрахIима. Ламаз эца ИбрахIим араваьлча, бертийи жIалеши хиннад Iехаш.
- Тховсара ираз доа ИбрахIим венав тхацига, - увгIаш хиннад жIалеш.
- Iуй Iобийшача, тховсара жа дуаргда, - увгIаш хиннай бертий.
- Жа даа яьхкача, оаха шо йоаергья, - увгIаш хиннад жIалеш.
Шийна бийнача устагIах ах устагIа цхьан гIийлача жIалена буабаьб ираз долча ИбрахIима. Цул тIехьагIа Iобийшаб берригаш а. Iурра жела йиъэ миIинге йиъ борз йийна уллаш хиннай. Саи-саи жIале йоаяьй уж, яхаш, шоайла къувсаш хиннаб Iуй.
- Уж бертий ура а оттайийя, жIалеш тIахеца, царна юкъера бертий йоаяь жIали белгалдаргда шоана, - аьннад ИбрахIима.
Iуша теркал ца деш хиннача гIийлача жIале, тIакхийтта, фоартангара хьалаьцай борз, вожаш кхераденна дIалийлхад.