Кицаш
Воча дешах мотт лорабе, къоалах кулг лораде.
Дукха вахар — дуне дика довзар.
Чубеллар - низ, гибеллар - мухь.
Сихало са диад, сабаро лоам баьккхаб.
Ший цӀагӀа - хьаьша, наьха цӀагӀа - фусам-да.
КӀоанолг
Унахои лори
Цамогаш хиннав цхьа саг. Лора хаьттад цунга, фуд хьа саготдер; вокхо дийцад, шийна чIоагIа хьоцар дувл, яхаш. Лора цу хьакъехьа аьннад:
- Из-м дика ма дий.
Цхьа ха яьлча, цу сагага юха а хаьттад лора, саготдер фуд аьнна; вокхо аьннад, шийна чIоагIа хорш ух. Лора юха а аьннад:
- Из а дика да.
КхозлагIа венав лор унахо волча, цун могашал миштай хьажа. Шийна маьженашка хий увтта даьннад, аьнна, хоам баьб могаш воацачо.
- Дика да-кх тIаккха, - аьннад лора.
Ше волча гаргара саг а вена, цо миштад хьа магар, аьнна, хаьттача, унахочо оалаш хиннад:
- Даьра, сов дика долаш, хIанз вала а мегаргволаш-м да.
Цу тайпара тIагIоллара соцамаш деча сага, эггара чIоагIагIа саготдеча хIамах а ираз хетача кхоачаву.