ХIанз йоккха саг я со. Бакъда йицлац иттлагIа шу долаш, се йиIиг йолча хана, хинна хIама.

Вай къам Сибре дахийта ха яр из. Петропавловск яхача городе дахар тхо. Цхьан Iан дийнахьа кабуц оаташ йоаллар са нана Iайшет. Цо хаьттар сога:

- Базар тIа яха ховргдий хьона?

- Ховргда, - аьлар аз.

- Базар тIа а яха, вайна морковкеи бураки эца еза Iа, борщ е йоалл со. Сога йиш яц цига яха. Ер да хьона ахча, - аьнна, сога кагий ахча хьакховдадир цо.

Гаьна яцар тхо дахачара базар.

- Дукха ца говш, сиха чуеллахь! – аьлар нанас, со арайоалаш. Морковкеи бураки ийца со цIайолаелча, цIаьхха са бIарг тIаэттар, базар тIара аравоалача, йоккха чемодан йизза Iажаш бохкаш латтача наха. Iажаш цига хилацар наггахьа мара. Кхалсаги маIа саги сибата гIалгIашта таралестар. Царна се IотIакхаьчача, цхьа кхалсаг латтар царца къамаьл деш. Цхьа боккха Iаж хьа а ийца, тараза тIа биллар цо.

- Фу дала деза укхох? – хаьттар цо Iажаш бохкаш латтача кхалсагага.

- Кхо сом, - жоп делар вокхо. 

Кхо сом царна дIа а денна, цIаста мо цIе Iаж а ийца, дIаяхар из кхалсаг. Из дIаяхача, юхе лаьттача маьра аьлар сесагага:

- Пхи сом хIана аланзар Iа цунга?

Цар вIаший деча къамаьлах, кхийтар со, уж гIалгIай хиларах. Iажага догьэтта, бIарахьежаш латтар со. ПIелг тIа а хьекха:

- ХIаьта укх Iажах фу доаккхаргдар оаш?- хаьттар аз гIалгIай меттала.

- Айя! ГIалгIа я хьо? – цецвалара хьисапе хаьттар сога къонахчо.

- Дала йоахае хьо хьай дадена! – аьнна, аз пIелг тIахьекха Iаж хьа а ийца, сога хьакховдабир цо.

- Аз, мах боацаш, лу хьона ер, - аьнна, со хьаьстар цо. Деррига дуне сайга кхаьчача мо, гIадъяха хьаийцар аз цунгара Iаж. ТIехьагIо мара ханзар сона, из Iаж «аппорт» яхача алмаатински сортах болга. ХIаьта цун чам сов хоза хиларах, из буаш цIагIа чукхаьчар со. Чуеча наьнага дIадийцар аз, мах боацаш гIалгIай къонахчо сайна Iаж баларах.

- Хьо гIалгIа йолга хайра цунна? – хаьттар цо сога.

- Хайра, - аьлар аз.

- ГIалгIай иштта ба хьона! – аьлар цо. - Доаккхал делахь, хье гIалгIа хиларах.