Массанена а дукха везаш ва диъ шу даьнна ши  кIаьнк. Шола ваь ва уж  шиъ. Цхьадола шола даь бераш, цаI шоллагIчох  къоаста ца луш,  тара хул шоайла. Хьасани Хьусени ишта сов тара бац. Цудухьа царна тIадувха барзкъаш а кIеззига эргаш да.

ЧIоагIа тIах аьнна ва уж шаккхе а. Даь-дас массаза  оал царга, селлара аьрдагIа ма хила, лозавергва шо шиъ, цхьаннахьа дIа а кхийтта. Цхьабакъда  Хьасани Хьусени вIалла шек воацаш, массаза удаш, ловзаш лелаш хул. Нане  хьоаста а хьоасташ, дехар ду ший виIий шин воIага; лоралуш хила, яхаш.

Къоаношта Iалаьмате дукха веза уж шаккхе а.   «Шоай берий бераш санна, шоай бераш дукха дезаре, нах нахала баргбар» яхача гIалгIай алара тоам беш, шоай дезалел дукхагIа уж шиъ везар къаьгга хоалуш бола къоаной, борд-бордагIа бела а белаш, берашка хьежаш хул. Хьасани Хьусени геттара аьрдагIа лела волавелча, даде оал царга: «Хьавола шаккхе а, даде фаьлг бувцаргба шоана». ТIаккха  Хьасана оал:

- Тхьовсача хана бувцаргба Iа. 

Хьусена тIатох:

- Сона хIанз беза фаьлг.

Дади фаьлг бувца волавелча, уж шиъ цунна уллув Iохов, ладувгIа ловш. ЦаI баьлча, цхьаькха а бувцаш, массехк бувц цо берашта. Къоаной вокх къонгий а  мехкарий а бераш  даьхкача, доккха цIай хул цу шиннена. Уж а Iоховш фаьлгашка ладувгIа.

Тахан наджгоанцхой бетта вурийттлагIа ди да. Ара цIайза шелал эттай, чилла йолаяларах.  Хьасани Хьусени соалозаш хахка, лай мажаргех ловза арабаха гIерт. ХIаьта нане, уж шелбалар кхераш, бахийтац. ТIаккха даде оал: 

- Вахийтал уж шиъ ара ловза, дIайха барзкъаш тIа а дийхе. Со а гIоргва царца, ераш когсоалозаш хахка а маркъилг кхостае а Iомабергболаш.  Ший бера ха дагаеха къоано волалу, зIамига шод етташ,  маркъилг кхестае, когсоалозаш хехка. Бераш, кIаддаллалца ловзаш а лийле, фусаме чубоагIа уж. Нане шурийла кхехкаяь йIайха гарзаш а,  чай а, чIаьпилг а оттадийя, бузабу дезал.

 Цул тIехьагIа йоккхача сага, тамашне хоза иллеш а даьхе, тхьовсаву ши кIаьнк. Бераш, гIараш ма елаш,  Хьасани Хьусени тхьайса улл шоана.