Кицаш
Наьха кий яьккхача, хьай кий тӀаьн кӏалха йолла.
Низ болча хьакхо наькъа юккъера ӀаӀа баьккхаб.
ЦӀаьхха шурах йиза бӀийг ловзаийккхай.
Лерга хаззал хоаставича, бӀарга хоаваллал вогӀ хул саг.
МагӀа баьрче агеи эгӀа баьрче Ӏасеи ма эшалда.
Мотт беце, къам а дац
ГIутакх
Вай метта юкъе долаш дале а, бакъда цох пайда эцаш бола нах кIезига болаш дош да гIутакх яхар. Из дицденна дала доалл, кердача дошлоргаш тIа из дийнде гIерте а, цунна керда маIан деннадале а. Лела ца деш хилча, дицлу моллагIа дош, из метта юкъе дукхагIа мел хул, сихагIа а дукхагIа а дIадарж мехка гIолла. Тайп-тайпарча дошлоргаш тIа эргаш да цу деша маIан. Из эггара нийсагIа да аьнна хет сона Малсаганаькъан Зоврбика духхьашха оттадаьча къаман дошлорга тIа. Цо аьннад, гIутакх - из я лоамарочун тIехкарах йоалла аьшка кIопилг. Укхаза цо дувцар хила деза метташ дола, тахан наггахьа мара го йиш йоаца къаьнара тIехкар. Цох Iодадача меттаел совгIа, йоаллаш хиннай зIамига аьшка кIопилг а, цо малагIа декхар кхоачашдеш хиннад тIехкараш хьадеча говзанчашта мара ховргдац тахан. Из дукха боккха боаца, тIехкар хоздеш бола гIирс ба, цу чу дукха хIама чуйолла йиш я оалалургдац сога. ЗIамига, куца хьаяь хIама из йолаш санна хеталу, цунга хьожаш волча сага. Кураза Зоврбика яхачох, хозача, тоабеннача боахамах оалаш хиннад «ГIутакх санна ков да из». Уж дешаш-дистар а дицденна дIадаьннад, лела ца дендаь. Сога хаьттача, хоза дистар да из, моллагIча заманга товргдолаш, леладе мегаргдолаш. ХIанз цун когаметта оал «Хоза боахам ба из», «ГIалаш мо цIенош да уж», «Говраш хахккал боккха боахам ба цунбар», и. кх. дIа. Во дистараш дац уж а, амма «ГIутакх санна боахам ба цунбар» аьлча къаьстта хоза сурт кхоллалу.
ТIехьарча хана арадаьннача дошлоргаш тIа керда маIан а деннад цу деша. Масала, Куркъанаькъан А. аьннад цох «гIутакх – портсигар», вешта аьлча гIаьленаш чуйоахкаю аьшка кIопилг я из, цо яхачох. Таренаькъан Л. Iилман кулгалхо йолаш арадаьннача дошлорга тIа керда ши маIан деннад цунна: гIутакх – пенал, къоаламаш леладу кIопилг. Тахан ишколе бераша лелаеча пеналах из ала мегаргда, цунга товш да аьнна хет сона из дош. Масала, ала йиш я «Дешархочун истола тIа дададар книжкаш, тетрадаш, къоаламаш чудоахка гIутакх»; «Тха классерча берий, цаI вокхох тара йоацаш, тайп-тайпара гIутакхаш я»; «Дешара керда шу дIадолалуш, хоза гIутакх ийцар Азас».