- Эца сона уж моргаш, -  аьнна дийхар цо наьнага.  

- Хье балха яхача эцаргья Iа,- аьнна, соцадир из къамаьл нанас.

Халимайна чIоагIа езар ший йоккхагIа йола йиша Фарида. Ишколе цо йоаккха ха дукха хетар цунна, тIаккха  балха йоде вIалла бIарга а гургьяц.

Шинна лерга чуйоахкаш Iаьржа бурилгаш а йолаш, йIаьха тIIирг а йолаш, яр Фаридайна беяьхкараш. 

- Фуй из? - аьнна, хаьттар  Халимата. 

- Наушникаш я, - аьннадар цунга Фаридас.

- Фарида, - аьнна кхайк нана, коча аьшк тохаш йоаллача йиIигага. 

- Аьшка юхе ма гIолахь, – аьле, тока чура аьшкасаьрг хьа а баьккхе, цIагIара арайоал Фарида, ший лергех йоахка наушникаш истола тIа Iо а яьхке.

Наушникашта бIарахьежаш латташ, цхьа ха йоаккх Халимас. ТIIиргаш Фаридайна новкъа йолга кхетадора цо. 

ГIанд истола юххе хьа а тетте, истола тIа латтача Фаридай ручкаш, къоаламаш чудоахкача пела чура кIод хьа а ийце, наушникашта йоалла Iаьржа ши бурилг кIодаца хьахоадаю цо.

Фарида юхаеча, ший бейоалла зIамига, Iаьржа ши бурилг йишийга кховдаю Халимас, ше даьчоа чIоагIа раьза а йолаш.

БIарахьежача юс Фарида.

- ХIанз хьога я Заремайяраш мо «ушникаш»,  тIIиргаш а йоацаш. ВIалла балха яха а езац, - оал Халимас, лохера ший боккха ши бIарг Фаридайгахьа хьожабийя.

- ХIанз-м я хьона уж бокъонца «ушникаш», - аьле, елалу Фаридайна тIехьа цIагIа чуяьнна нана.