Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Фаьлг
Циски дехкийи
Циско дув биаб; дахка буаргбац, аьнна.Цигара дехкий гулде дагадеха хиннад циска, царга къамаьл де, ше биа дув дӏакхайкабе, аьнна. Цхьан дахко, из шийна дӏахезача, аьннад йоах ший новкъостага:
- Хьо боагӏий циско къамаьл деча?
Хӏаьта хьалхарча дахко ший новкъостага юхахаьтта хиннад:
- Мекхаш даьнна дарий циск?
Тӏаккха хатта бенача дахко аьннад:
- Дӏадаьша дацар.
- Тӏаккха со багӏац, - жоп деннад вокхо.
Къамаьл де дӏаэттача циско, ший оамалаш йиц ца луш, ше мел бола дахка биа хиннаб. Цу хана денз, мекхаш долча цисках тешац дехкий.