Кери къайги новкъостий а хинна, новкъа даьнна хиннад. Моцалла дӏаяха а ца могаш, эттача къайго керага аьннад:

- Хӏанз со кӏалйисай. Аьлан коа енна сиргӏа улл. Цу сиргӏан тӏаьнах е гӏогӏах ӏа дулха коарчам ца дахье, сона дӏаяха магац.

  Аьлано боангаш а егӏа, тийшача балха, къайгаш лувца аьнна йилла хиннай из сиргӏа.

  Боанго кер лаьцад. Аьшка саьргаш адийца, цӏа а даь, кер чуделлад аьлано.Боанго лаьца кер дита а дита, къайг дӏаяхай.

  Хӏаьта иззамо дола кер хиннад, чудоаллача кера дийнахьа кхозза тӏа а ухаш, мухь бетташ урагӏъухаш, юха ӏотӏаухаш цӏувза а цӏувзаш лелаш. Моцалла увгӏа бертий санна, увгӏа кераш бӏаргадайнача аьлано хьавехийтача, са мел доаллача хӏаман мотт ховш волча Сулейма-пайхамара аьннад нахага цар фу дувц:

  «Хьона доагӏаш-м хиннадар ер, ӏа къайгаца биллача оагӏонга хьежача. ӏа оагӏув кераца е лаьчанца биллабаларе, хургдацар ер. Дала сий долаш кхелла да кер, ткъамаш лакха а айду, дожача хана ворхӏ сигален лакхера а дож, хӏаьта къайгал-м котам а тол...».