Кицаш
Наьха кий яьккхача, хьай кий тӀаьн кӏалха йолла.
Низ болча хьакхо наькъа юккъера ӀаӀа баьккхаб.
ЦӀаьхха шурах йиза бӀийг ловзаийккхай.
Лерга хаззал хоаставича, бӀарга хоаваллал вогӀ хул саг.
МагӀа баьрче агеи эгӀа баьрче Ӏасеи ма эшалда.
Дувцар
«Барзкъаш дутта порошок я...»
Халкъа багахбувцам Iомабеш хиннад юртара бераш. Классе чуенача хьехархочо аьннад:
- ДIаяхача урока тIа вай дийцадар багахбувцама жанрех лаьца. Хьан аргдар, фу маIан да жанраш яхача деша?
- Багахбувцама тайпаш да уж, - аьннад кулг айдаьча йиIига.
- МалагIа тайпаш довз шоана багахбувцама? Алал Яни.
- Багахбувцама дукха тайпаш хул: фаьлгаш, кицаш, шира дувцараш, мифаш, иллеш, ховли-довзалеш, кхыдараш.
- Ини, хьалгIаттал хIанз хьо, - аьннад хьехархочо, - хьадувцал тхона, миф яхар фуй.
- «Миф» яхар барзкъаш дутта порошок я, - яьхад Ине.