Лечкъаргах, тIехьаударгах, бIаргаш дувшадаргах ловзар уж. Наггахьа корсама гаьнаш тIара гаьнаш тIа кхувсалуш, бIарашдуаргаш хоалора царна. Дукха ха йоаккхар бераша цунга хьежаш. Юкъера тIомараш дIа а яьха, четакотингаш корайора,  гурахьа Iолийгача гIаьнашта кIалъяха ядаш. Хьалха долхача берел тIехьависа  воагIар Бек-хан. ГIорабаь бада хьункхораш  лохьабеш лелар из.

- Хьадувла чехка,- цIогIа техар  кIаьнка. - Сона фу бIаргадайнад хьажал!

- Ай, фуд цига? Фу бIаргадайнад  хьона? 

Массарел воккхагIа вола Висан хьатIавера Бек-хана.

- Хьажал, лаьтто садоах,- аьлар кIаьнка. - Гой шоана, гаьна кIалха? - аьнна, пIелг IотIахьекхар Бек-хана.

Дика зийча, айлуш-южаш, айлуш-южаш яр гаьна кIалхара лаьттан чIегилг. Йокъаенна гIажилг хьа а ийца, тIера гIаьнаш дIа-хьа даьхар Висана. ТIаккха, дIагарга а ваха, Iолохвелар. ПIелг хьекхар. Боккха ши бIарги муIеи яйра цунна гIаьнашта кIалхара араяьнна. Арккъалваха, велавелар Висан.

- Ма къонахий да-кх  вай, чоапилгах а кхераденнадале! – аьлар цо.

КIор санна Iаьржа а йолаш, бочабIар миссел  йоккха а  кизга санна къегаш а яр бIуцал, лаьттан кIалхара араяла гIерташ яьлла.

- Мецъенна хургья из, - аьлар Бек-хана. 

Ший гибоалла тIормиг Iо а баьккха, цу  чура маькха чIегилг Iойиллар цо бIуцала хьалхашка. МеттагI ца йоалаш, латтар вож. ТIаккха шорттига дIайийрзар.

- Ва Iовдилг, – йоахар цо  ший дагахьа, - мичахьа яйнай хьона маькх юа чоапилг?!