Кицаш
Хац, дац - цхьа дош; хайра, дайра - эзар дош.
Туро цаӀ мара вийнавац, метто эзар вийнав.
Лохига саг дегала хул.
Виза вар аьле, кхача боацаш а ма гӀо; йийкха яр аьле, кхоллар до
Шийна тӀера вир-говр дайнадац, наха тӀера хенжа-меза байнаб.
Сакъердамилгаш
Лоалахочун гIаж
Лоалахочун кхий чу а ваьнна, гIаж лаца гIерташ ваьллав Цаген. Из бIаргавайнача лоалахочо хаьттад:
- Iа фу леладу?
- ГIажа урс хьакха воалл со, - аьннад Цагена.
- Са гIаж ма йий из, - аьннад лоалахочо.
- Хов сона, - аьннад Цагена. - Ах хьонеи ах сонеи хургйолаш е воалл со.
- Ай, хьай коара хьа а лаьца е мегаций Iа? - аьннад лоалахочо.
- Мега-м мегар из, - аьннад Цагена, - са коа яларе.