Йоккхий лай чоалпингаш елхаш, хоза Ӏан ди дар латташ. Сел хоза, цӀена долаш, дото кӀийгех къегар лоа. Цу тайпара хаоттам чӀоагӀа хоза хет Хаматхана. Тахан а воагӀа из гонахьарча кӀайча Ӏаламо дог гӀоздаьккха.

ЙиълагӀча класса дешархо ва Хаматхан. Сакхетам лакха болаш, дешарах дика кхеташ, кӀаьнк ва из. Цудухьа старосталла а хержав классо.

- ХӀанз чукхаьчача, соалозаца хохкавала гӀоргва со атагӀа, - йоах цун уйлаша.

- Ма сиха вода хьо, йорт ийца! Со-м ишколера араваьннача хана денз, хьона тӀехьакхе ца могаш ма воагӀий! - аьлар, цунна тӀехьакхийнача новкъоста Илеза.

- Хьакхайкаргвар-кх. Багара мотт Ӏобежабар хьа? - аьлар Хаматхана, ший мерза уйлаш цо йохаяь, кӀеззига дега Ӏеткъадар цун.

- Кхозза-м кхайкавар, хьо-м вацар хӀама хозаш.

- Сиха вар со.

- ДӀа-юха водаш ва хьо?

- А, - корта оагабир Хаматхана.

- Тика тӀара хьайна барзкъаш эца вода хургва хьо?

- Водац! - лоацца жоп делар Хаматхана.

- ХӀа, шоай дада волча хьоашалгӀа?..

- А, - юха а корта оагабир цо, тӀаккха тӀатехар, - атагӀа.

- Воай, шийла ма йий вайна, лоа улл гобаьккха, кӀоарга дилла, сенна вода хьо цига?

- Соалозаца хохкавала вода-кх, кхы сенна вода атагӀа?.. Хьо воагӀий соца? Цхьана сакъердамегӀа хургья вайна. Цига сона бовзаш лакха гув ба. Мишта масса йода хой хьона, цу тӀара Ӏочухаьхка соалоз?

- Сона-м цӀагӀа вагӀаш хозагӀа хет, сайна хоза дӀайха чай молаш, телефона чурча ловзоргех ловзаш.

- Ӏай! - аьлар, юха а сеца Хаматхана. - Къавенна воккха саг ва хьо, дӀайха чай мелаш, пешка юхе цӀагӀа вагӀа?

Велавелар кӀаьнк, новкъоста дувцачох. 

- ТӀехкаш вӀашкалатаргья хьа, хьо иштта вагӀе.

- Из фу яхилга да? - кхийтанзар Илез.

- Хьох мекъашк хьахургва яхилга да-кх. Магар а ийша хул цхьан метте вагӀачун. Даим лелаш хила веза, тӀаккха кадай хул, дегӀ а дикагӀа лел. Иштта дувц тха даде.

Кхы уйла янзар Илеза. 

- Со а воагӀа хьоца! - аьлар цо.

Цу дийнахьа дукха хийхкар бераша соалозаш, кхыметтел Хаматхана чудолх вай, укх сахьате садовргда аьлча а, чуваха кхетацар Илез.

ХӀанзалца соалоз ца хохкаш, ше фу деш ваьгӀав кхетацар кӀаьнк. Амма, цу хана денз, кхы цхьа ди дӀадахийтанзар цо, лоа мел долча хана, соалозаца хохкавала ца водаш. Ший зӀамагӀа йола йиша Салима а лоалахой бераш а хьатехар Илеза шоаех.

Шоаш дукхагӀа хилча, сакъердамегӀа хулар берашта. Соалозаш хийхка баьлча, лай мажаргех ловзар, лай мунда а йора цар.

Юкъ-юкъе Хаматханага оалар Илеза: - Ма дика болх ба-кх, Ӏа со хьайца цу дийнахьа соалоз хахка вийха! Баркал хьона, Хаматхан!