Цхьан хьун петарашка ягIар хоза га – къахььэсти. ЧIоагIа хоза хетар цунна ший хьунагIа. Шорттига хьекхар мела мух. БIайха хьежар малх. Хоза яр бIаьсти. ГIаьнаш бесах лепаш, ягIа къахььэсти. Бакъда цхьан дийнахьа коастъюарг чуяьлар цун коаста кIалха. Коаст яа йолаелар из. Ден-бус юар цо из. Араялацар чоапилг коаста кIалхара, шорттига лелар, цхьаннена ше лелаш хозаргйоацаш. ХенахзIокьеттарг хьайоагIе, цун ираз ма дайнадий. ХенахзIокьеттарга гучайоале, из хIалак ма хургйий, зIок теххá дIакхоалларг ма йий из. 

ВIалла хьалйизацар коастъюарг – юаш, юаш, юаш яр из. Гаьнá лазар дора цо. ХенахзIокьеттарг хьаярга догдоахар цо. Из дукха говш хуле? ТIаккха лергья къахььэсти.

Керда Iуйре эттар хьунагIа. Марта дуаш яр коастъюарг; мочхал хьокхадеш, хьокхадеш, хьокхадеш. Цигга хезар цунна ткъамаш тохаш. ЦIаьхха, хезар цхьанне хенах зIок тохаш. МоарзагIаца ше хьалаьцача санна хийтар цунна. УрагIъяхар из. «ХенахзIокьеттарг!» – уйла чуессар коастъюарга керта чу. «Ва, нани, оарцагIъяла!» – цIогIа даьлар коастъюаргага.

Чам бола чоапилг дIакхаьллар хенахзIокьеттарго.

Доккха садаьккхар паргIатъяьннача гаьно.