ПхелагIа шу долаш ва Рахьим. Ноанахошта гаьна йоацача юрта бах цар дезал. Бетта, шин бетта цкъа яхар санна, нанас ше даьцIа йоагIаш, хьавоалаву из. МоллагIа бер санна,  тайп-тайпара ловзараш а керда куцаш а дезаш ва кIаьнк. Массанахьа кхоачаш, шийна ца дайна хIама корадоагIий хьожаш, хул из. Цул совгIа, компьютерца  ловза Iомавеннав.

Цкъа цхьан дийнахьа ноанахошка венача хана, ишкапа чура доккха сурти альбоми кораду кIаьнка. Цунна вIалла а дайнадац  из. Хоза хеташ сурташка хьежаш воаллаш, цу сурташ тIара нах шийна ца бовзандаь, наьна-вешийга  каст-каста «ер малав, ер мала я» яхаш  хаттараш ду цо. ТIеххьара а наьна-веший пхи-ялх шу даьннача хана даьккха  сурт бIаргадайча, хоатт кIаьнка; ер малав, аьнна. 

- Из со ва, хьо санна зIамига волча хана...

- Ай, воккха хIана хиннав хьо? Цхьана ловзаш леларг ма дарий вай, - оал Рахьима, цецваьнна, кIирвенна кертагара денз когашка кхаччалца цунна бIара а хьожаш.

- Гой хьона, хIара саг зIамига волаш малха а ваьле, хулаш-хулаш воккха хул. Хьажал, цхьа шу даланза волча хана, хьо мишта хиннав,- аьле, комьютер чура  сурт а альбома тIара цхаькха сурт а дIахьокх наьна-вошас кIаьнкага. 

- Со а иштта зIамига хиннав?-  цецвоал Рахьим.

- Хиннав-те, укх дунен чура хIара саг а санна зIамига хиннав, тIаккха саббаре воккха хиннав, каста со миссел хургва хьо.

- Хьо санна воккха хургва со?- хоатт кIаьнка.

- Хургва, даьра.

- Кхийтар со, - оал Рахьима, доккха са а даьккхе.