Беки юртда волаш, вена хьаэттав ши саг, шоайла къовсавенна. Цхьаццане дувца, аьннад Беке.

Хьалхарчунга дикка ладийгIад цо. Дукха хабар дийца ше йистеваьлча, цхьанне хаьттад: «ХIанз Iа къоастадел, бехке ва со е вац со?»

- Хьо бакъва, новкъост, - аьннад Беке.

Из Iохайнав.

Волавеннав къамаьл де шоллагIвар, геттара ше бакъве гIерташ, хьалхарчо мел дийцар харцо я, яхаш.

Ше дийца ваьлча цо а хаьттад: «ХIанз Iайха ел Iа кхел, со бакъва е вац?»

- Хьо бакъва, новкъост, - аьннад Беке цунга а.

Гаьна воацаш хиннача Беке воIа, дас денна жоп хеза, хаьттад: 

- Iа царех хIаранега ях, хьо бакъва, иштта хила йиш йий?

- Хьо а бакълув, воI, - аьннад Беке.

- ТIаккха малав бакъвоацар? - аьннад воIа.

- Бакъвац из Iовдал, со юрта доал де хоаваь.