Кицаш

Сиха даха хий фордах кхийттадац.

Везар велча, велхар даьннад.

БоргIалах Iаха енна котам яьттIай.

Кхийрачох турпал хиннавац.

ЦIи ца йийзача, кIур ихабац.

Дошлорг

ОагIой бутт (ба) - декабрь.
Седкъий дагардер (ва) - звездочёт.
Баскилг (да) - кузнечик.
Хамхе (я) - горное село Хамхи.
Тирк (да) - река Терек.

Коазой Нурдин

йоазонхо

Дувцар

Йилбазговр

Iуйре хиннай. Баьцаш тIа къег тхира тIадамаш. Чоапилгаши, нIанийи, гизгаши, мозийи, миталаши араяьннай баь тIа. Кхыметтел когахъухаргаш а лаьтта кIалхара араяьннай. Хоза я Iуйре. Сийрда ба малх. ЦIена да фо. ЙIайха я баь тIа.

ЦIаьхха, корзагIдаьлар баь тIара халкъ. Фу хилар? Фуй из йоагIар, баь тIагIолла?

Горийдоадерг-йилбазговр гIетта йоагIа, баь тIагIолла. Горий лечкъар кхераденна баьцашта юкъе, гIаьнашта кIалха, лаьттах доахкача зIамигача Iургашка-къоргашка. Мозий а чоапилгаш а йилбазговрах лечкъар. 

Мича йода йилбазговр? Йилбазговр Iам тIа йода, Iама кизга чу хьажа, ше мишта хоза я: сийна ткъамаш, доккхий бIаргаш, йиткъига юкъ! 

«Дий укх баь тIа кхы сол хозагIа дийнат?» – уйла ю йилбазговро.