Iи мерца дIайха денача ахкан дийнахьа, доккха хьоалчагIа дар, Даби-Юртарча Сипсой Соалгочун ворхIлагIча воIа саг йоалаеш. Хьалха йоалаяь ялх нус, цу коа кхесташ яр; ше-ше нахал тIех  я, дикагIа я алийта  гIерташ. Цхьабараш шоай хьинарца, вожаш багенца.

ЗIамигача Лидай нана  Софият а яр, дикагIа йола нус хила гIерташ. Цхьабакъда, дика шийх бIубенна из гIулакх де йолалушшехь, цхьанне хьаехар из. «Жи, Софият сихха гIолахь, коа наIар тIагIолла Iододача хи тоатолга чу ийккхача Лидас, ше тIоадаяьй, хIамаш хоттах йизай» - аьле. Кхозза-диазза мелача хица лувча а йийя, цIенагIа дола барзкъа тIа а дийхе: «Кхы хи йисте ма гIолахь, кхы хьо йошайой аз еттаргья хьона», - аьлар нанас, кхо шу даьннача ший йиIигага. «Мегаргда», - аьнна, нанна дош а денна, йиIиг дIакъайлаяьнна йоккха юкъ яцар, цIе цIогIа детташ, елхаш из юхайоагIача хана. Елхара къургаш а деш, йоахар бера: «Мама, мама, хIанз со бехке яцар хьона, папас ше хий менна ваьлча, йоккха курашка йизза хий техар сона». Из соцае дагахьа, нанас шорттига аьлар Лидайга: «Ма елха, ма елха, хов сона хьа бехк боацилга, мамас укх сахьате дика еттаргья папайна, хьа хоза коч цо тIоадаярах». Из цо оалача юкъа, гучаваьлар йиIига да. ХьоалчагIа деча  хьабоагIа маIа нах цIагIа чубоахаш вар из. Юха а цIе цIогIа даьлар Лидайга, даьна пIелг тIахьежабеш, йоахар цо: «Мама, мама, дIа вода хьона IотIаеде, IотIаетта цунна». Коа мел дола адам, цох сакъердам хинна, заггIе делар. Цхьабараша белам баккха йоахар: «Даьра, цIагIа ца еттаре, бера ишта атта арг-м дацар». ХIаьта Софият, маьрцIейх озаенна, къайлаийккхар.