Дика саг Iоажал йолаш вац, хIана аьлча наха цIаккха вицлуц из, вахар дита, Iел дунен тIа кхаьчача а. Цун хоза гIулакхаш, дика цIи яха юс. Иштта, шийх долча дагалоацамашка гIолла наха йIовхал телаш, цар дегашка ваха висав хIанз са вувца безам бола саг а. Из ва Дидиганаькъан Бексолта Борис. Кховзткъа иттлагIча шерий юхьиг яр из. Со деша вагIар Наьсарерча № 1 йолча юкъерча ишколе. Цига балха вера керда хьехархо. Тхона хьалхашка латтар лакхача дегIара зIамига саг. Ше Казахстанера дукха ха йоацаш цIавенилга хьахайтар цо.

Бексолта Борис ваь хиннав 1936 шера. Уж виъ вошеи ши йишеи хиннад. Йижарий зIамига болаш байнаб. Саварбик, Жамалда, Бек-хан яхача кIаьнкашта юкъе Борис кхоалагIа хиннав. Мар венначул тIехьагIа, цу зIамигача кIаьнкашца цхьаь юс цар нана Белхарой Зайнала Iайши. Цу хьале йолаш Сибре а юг. Бориса цIермашиннаькъахой ишкол йоаккх Акмолинске. Деша отт лоаман- металлургически институте, бакъда Сибре бихьача нахах ва аьле дIавоаккх. Цул тIехьагIа, цо комсомольски болх баьб, вай цIадаьхкачул тIехьагIа комсомола Нохч-ГIалгIай обкома секретарь хиннав. Дийшад партийни ишколан газетаца болх бе Iомалуча отделене. ДIахо кхы а массехк вузе дийшад Дидиганаькъан Бориса. ТIехьагIо цо яздергда, ший нана БатIал-хьажий цIен тIара хилар бахьан долаш, дIахо балха тIа лакхвалийтанзар ше, аьнна. Иштта тайп-тайпарча вахара наькъаша, ший кхело воалаваьвар из Наьсарерча ишколе.

Истори хьехаш цхьа юкъ яьккхачул тIехьагIа, тхона хезар из сайранарча ишколан кулгалде хьожаваьв аьнна. Цу заман чухь яр ШРМ (школа рабочей молодёжи) оалаш йола ишкол. Дийнахьа деша мукъа боацача, балха болча кагийча нахаи мехкараштеи лаьрхIа яр из. Борис, ший мехка цIавенача хана, ваха сецар Наьсарерча эггара хозагIа цIи йолча урам тIа. Улица Мира оалар цох. Цу хана дезалцара къаьста вар из, Ужахьанаькъан Роза яхача литературоведа яь йоI йолаш. Цо шозлагIа йоалаяьр Гадаборшанаькъан Iалаудина Аза яр. 

Дидиганаькъан Борис редактор хул Наьсарен кхален газета. Юххьанца цох хул «Ленина никъ», тIаккха «Наьсархо», цул тIехьагIа «Наьсарен оаз». Цхьаькха цхьа газет а леладир цо, лоалахой шин республикан юкъе тIема хьал эттача хана. «Вестник Ингушетии» аьнна цIи а тилла, администраце гIонча санна арадийлар республикански газет. Тахан Борис вайца вац, из кхелхав 1995 шера.