Кицаш

Даькъазчоа даьцӀагӀара а енай сагото.

Хьаьша ца везар, Далла а ма везалва.

Ше бувш, дахко а техай царг.

Царгаш йоацаш борз хиннаяц, шелал йоацаш Iа хиннадац.

Дас хестаяь говр хьалхаяьннаяц.

Дошлорг

Шоршал (да) - дрозд
ХьаIинг (да) - икота
Неш (я) - подруга
Мецхилг (да) - стриж (птица)
ДамагIа (да) - толстая кишка животного

Доданаькъан Митакха Iамар-Iаьла

ГIалгIай къаман дIадахар, цун дика нах бовза волавелча, цкъаза хьо цецваллал хIамаш корадоагIа цунна юкъера. Цун къонгаша тайп-тайпарча замашка леладаь гIулакхаш, лайна бала, гойта турпалал ла денал мичара денад-хьогI вай къаманна яха уйла йосс дег чу.

 Ишттача нахах цаI хиннав МагIалбика кхален Долакоа ваьха Доданаькъан Митакха Iамар-Iаьла. Из ваь хиннав 1920 шера. Дезала да Митакх чулахойх хиннав, нана БуноевгIар тайпан Долакоара хиннай.

1930 шера, ший 10 шу даьннача хана, юртарча ишколе деша вода из. Пхи класс яьккха ваьлча, из Буро тIарча хьехархой техникуме деша ваха хиннав. Цун директор волаш болх беш хиннав цIихезача большевика-революционера Iоахарганаькъан ГIапура воша Осман. Хорш ухаш ва, цамогаш ва, аьнна, цIавахийтавале а, хьехархочун дешар ца дийшача Iац из. Шолжа-ГIалий тIа вахе, юха деша а этте, дешарца бувзабенна болх бергболаш, курсаш йоах цо. Цу хана, радио чугIолла хьакхайкаду; радиокомитете гIалгIай мотт дика ховш вола диктор веза, аьнна. Ший ма хулла сихагIа  цу адресах вода из. ДIаэц из цига. Из хIама 1938-ча шера хиннад. Цигара деша вахийтав гIалгIай зIамига саг, кердача хоамий редактор хургволаш, Гуржий мехка. Кхаь  шера дешаш а хинна цIавеча, из хьожаву Пригородни кхален радиовещане редакторалла а дикторалла а. Цул тIехьагIа Шолжа-ГIалий тIа а цу тайпара болх беш хиннав из. ТIом тIабалцца уж ши гIулакх леладу цо. ТIом болабелча, ше дехар а яздаь, тIем тIа ваха хиннав вай мехкахо а. 

Вай мохк бохабича, тIема юкъера хьа а ваьккхе, Казахстане Iовохийт. Лаьцав Iамар-Iаьла, цунна беш хинна бехк 25 шу суд йоагIаш хиннаб.  Шийна тIатеттача хIамашта керасти даьдале а, хIаьта а 10 шера  Якуте  дIавахийтар из, цу ерригача хана дошув доаккхача  бригадир волаш къахьийгар. 

1957 шера цигара цIавеча, Боканаькъан тайпан Зайнат йоалаю цо. Сибре вигале ший хинна болх лу цунна. Цигара из вода «Сердало» газета редакце корректора а тIехьагIа ревизионни (керттерча) корректора а болх бе. Иштта къахьег цо 1966-ча шера ше пенсе ваххалца. Долакоа ваха юхавеча, НГДУ «МагIалбикмехкдаьттан» оператар волаш а болх бу цо. 

Боккха дезал хиннаб Iамар-Iаьлий: ялх воIи кхо йоIи. Кхозза ХьажцIа ваха хиннав, цу даькъе ший даьна, нанна тIера а. Iамар-Iаьлас ший 87 шу даьннача хана яздаьд «Са вахара наькъаш» яха книжка. ХIаьта кхы а ши шу даьлча, 2010 шера, ший 89 шу даьннача хана, кхелхав Доданаькъан Митакха Iамар-Iаьла. ДIавеллав даьй баьхача юрта.