Кицаш

Даькъазчоа даьцӀагӀара а енай сагото.

Хьаьша ца везар, Далла а ма везалва.

Ше бувш, дахко а техай царг.

Царгаш йоацаш борз хиннаяц, шелал йоацаш Iа хиннадац.

Дас хестаяь говр хьалхаяьннаяц.

Дошлорг

Шоршал (да) - дрозд
ХьаIинг (да) - икота
Неш (я) - подруга
Мецхилг (да) - стриж (птица)
ДамагIа (да) - толстая кишка животного

Чахкенаькъан Ахьмада Башир

Вай къаманна вицвала йиш йоацача нахах ва аьнна хет сона Чахкенаькъан Ахьмада Башир. ДIадахача бIаьшерен 70-ча шерашка денз, каст-каста Нохч-ГIалгIай телевидене хила везаш гIулакх оттар са.

 Цу хана байзар сона республикан телевидене къахьегаш мел бола гIалгIай. Уж берригаш бар гIалгIай передачаш еча редакце. Цхьаькха гIалгIа вар, цига балха вале а, дукхагIча хана ше еш йола передачаш эрсий меттала еш. Из вар спортаца дувзаденна хIамаш дувцаш хинна Чахкенаькъан Башир. Республикерча газетий оагIонаш тIа цо кепа еттар граждански тIема турапалех долча ший йоазошта. Уж цу хана, коммунистий Iаьдал долаш, чIоагIа бувцаш а сий долаш а бар. Из кхетаде хала а дацар, хIана аьлча уж бар латташ дола Iаьдал даьккхараш. 

1992 шера Шолжа-ГIалий тIара хьалвена, Наьсаре гIалгIай телевидени хьайир цо. Вешта аьлча, ГIалгIай къаман эггара хьалхара телевидени хьаяьча сага цIи санна исторен чухьа йисай Башира цIи.

1993-ча шера кIимарса бетта 31-ча дийнахьа арадаьлар  цу бетта 19-ча дийнахьа ГIалгIай Республикан Президента №227 йола Указ. ГIалгIай Республикан архивни гIулакха паччахьалкхен комитет хьаярах а,  Чахкенаькъан Ахьмада Башир цунна кулгалде хьожаварах а дар из.

Ахьмада Башир ваь хиннав 1938-ча шера.  Ишкол яьккхачул тIехьагIа, Москверча университете  журналистий факультет яьккхай цо. Болх баьб мехка керттерча телевидене а радио а корреспондент волаш, дуккхача юкъарча балхашка дакъа лоацаш хиннав. Цо яьккхай Бакура аспирантура. Iилман балхаш яздарах, цунна еннаяр исторически Iилмай кандидат  яха цIи, иштта из хиннав политически Iилмай доктор. Къаьстта теркам тIаозаш ба исторически Iилмай кандидата цIи цунна енна бола «ХIХ бIаьшерен шоллагIча даькъацара, ХХ бIаьшерен юхьигацара Нохч-ГIалгIай культуран тIехьале» яха Iилман болх.

Башира, ше журналист хиларах тарра, дукха очеркаш язъяьй гIалгIай цIихезача нахах. Уж арайийннай «Грозненский рабочий», «Сердало» яхача газеташ тIа, тайп-тайпарча книжкаш тIа. Царех цаI да Хамченаькъан Султана оттадаь, «Ший овлаш довзар» яха книжка. Цунна юкъеяхай Чахкенаькъан Башира   язъяь ши очерк. Хьалхаръяр Албохчанаькъан Ювсапах, шоллагIъяр Малсаганаькъан Зоврбиках я. 

1996 шера Чахкенаькъан Ахьмада Башир Керттерча хоржамий комиссе Россе президент харжа аьнна дIаязваь хиннав.

Кхелхав Ахьмада Башир 2008 шера.