Колой Османа Халат ваь хиннав 1948 шера тов бетта  18-ча дийнахьа  Казахстана Кустанайски областе. Ховш ма хиллара, из я вай мехкахдаьха хинна ха. Цун да Осман вай Сибре дигале а цIадаьхкачул тIехьагIа а, Наьсар-Кертерча почта кулгалхо волаш, къахьегаш хиннав. Дезала нана Цхьорой  Маликат,  цIа-ков леладеш, хьаенай; ший маьра дика оагIув а гIонча а йолаш. Царна шиннена а дика карагIдаьнна хIама да ала мегаргда, цIена тIехье кхеяр. Кхо воIи цхьа йоIи дар цар.

1957 шера Наьсарера №2 йолча ишколе деша вода кIаьнк. Цига бархI шера мара дешацар. Из яьккхача кхы а шин шера деш цо №1 йолча ишколе.    1967 шера, ишкол чакхъяьккхача, Колой Халат эскаре гIулакх де тIахьех. Чехословаке кхоач гIалгIай зIамига саг. Из цига волаш, Советски Союза духьала а дерригача эрсий халкъа духьала а бунт хьоаю мехка. Халат хиннача полкацарча тIемхоша соцабу из гIоттам. Полка чубоагIача бIухошта цу «Дечин-ГIалан сийдола  нах» яха цIи  лу.

Грачана яхача моттиге латтар Халата гIулакх деча эскара керттера группа (ЦГВ), цига 1969 шера хьаделл «Советски салте» яха газет, шийна чуйоагIаш тIема корреспондентий ишкол йолаш. Ах шера цига дешаш хул вай мехкахо, цул тIехьагIа, лакхе хьоахадаьча газета корреспондент волаш, къахьег цо.  Эскаре гIулакх даь ваьлча, из Львоверча университета  журналистикан  факультете деша дIахьожаваьвар. ЦIенна гаьна хиларах, дего къоабалдинзар цига деша гIолга. Москверча М. Ломоносова цIерагIча  университете ваха лайра цунна. Университет чакхъяьккхача, Россе гIоръяьннача гIалий тIа Iомадаьр чIоагIде, шаьрде (практике) вохийт из. Иштта кхоач из сийлахь-воккхача поэта Есенина мехка – Рязане, цигарча «Приокская правда» яхача газете. ТIаккха вода из Буро тIарча «Социалистическая Осетия» яхача газете. Ийс бетта цига болх бича, парте Наьсарен райкома хьалхарча секретара Маькенаькъан Асхьаба тIа а вийхе, районни газета юртбоахама отдела кулгалдар дех цунга. Наьсарен газета керттера редактор волаш  а болх бир цо 90-ча шерашка. Редактора Оcмана Халата  Россерча газетий керттерча редакторий Клуба доалахьарча «ДиълагIа Iаьдал» яхача журнала тIа кепа еттар ший йоазошта. Масала, цун 5-ча,6-ча номераш тIа 1996 шера арадаьлар гIалгIай-хIирий къовсама хьакъехьа Президентага Б. Н. Ельцинга цо даь кхайкарал.

МВД полковникаца (Дала гешт долда цунна) Котанаькъан Макшарипа Ахьмадаца цхьана Кхерамзлен Совете болх беш ха яьккхар цо. 

Османа Халат вар «ГIалгIайчен культуран сийдола болхло», Россе журналистий Союза доакъашхо, дунен халкъашта юкъерча журналистий Союза доакъашхо.

Халатеи хьехархо йолча цун фусам-нанас Малсаганаькъан Салангире Лидаси кхедаьдар ши воI, ши йоI.

Кхелхав Османа Халат 2024-ча шера.