Наьсаре 70-ча шерашка денз, наха бовзаш, тайп-тайпарча халкъа боахама доакъошка накъабоалаш хьабаьхкача наха юкъе ший белггала моттиг йолаш вар Ужахьанаькъан Руслана (Расухана) Iамархан.
Iамархан ваь хиннав 1939 шера Нохч-ГIалгIай АССР Пригородни кхален Мочкъий-Юрта. Вай Сибре дугача хана, из, даггара даьннадале а, 5 шу даьнна кIаьнк мара хиннавац. Вай юха мехках кхетача хана, ишкол яьккха, 17-18 шу даьнна зIамига саг хиннав из. 1957 шера вайна цIадахка мукъа белча, юха мехкаваьнна, Шолжа-ГIалий тIарча хьехархой паччахьалкхен институте деша отт зIамига саг. Хетаргахьа, дика дийшачох тара да цо ишколе вагIаш, цунна тешал ду цо хержа хиннача факультето а. Из деша этта хиннав филологически факультете, эрсий мотти литературеи хьехаш волча сага никъ хержа. Цу хана цу тайпара говзал йола хьехархой вай къаман кIезига бар. ДукхагIбараш арахьара тIаиха хьехархой бар эрсий мотти литературеи хьехаш хиннараш. Ювцаш йола институт Руслана Iамархана чакхъяьккха хиннай 1963 шера. Цу заман чухьа Наьсаре ши ишкол мара яцар: цхьоалагIеи шоллагIеи. Иштта ишкол-интернат №13 яр. Цхьан юкъа хьехархочун болх баьчул тIехьагIа, Руслана Iамархан цу интерната директоралла хьожаву. Из цига къахьегаш хилар 8 шера. Цу заман чухьа интернат; хозлуш, тоалуш, дешара гIулакх лакхарча боарам тIа леладеш; хьаенай ала йиш я. Цига цо беш бола болх зийнача Нохч-ГIалгIай дешара Министерствос из балха хьожаву Наьсарен кхален халкъа дешара отдела кулгалхочун дарже.
1987 шерга кхаччалца бир цо из болх. ДIахо цо хьийга къа ишколашца дувзаденна деце а, бакъда хьехархочун сабар а говзал а чIоагIа езаш дар. Наьсарерча АТП директоралла хьожавир из. Духхьал къамаьлаца къам дукха дийза ца Iеш, ший гIулакхаца а хьахайтар цо гIалгIай шийна дукха безилга. Мехкахдаьха хиннача къамашта тIера бехк дIабоаккхаш дола Закон тIаэцийта гIерташ, ГIалгIайчен паччахьалкхе меттаоттаяйта гIерташ, къахьийгарех цаI хиннав из. Из гу вайна, Москве ЦIеча майдан тIа лакхе хьоахадаь Закон тIаийцача дийнахьа сурт даьккхача наха юкъе. Цунца цу сурта тIа ба цIихеза нохчий а гIалгIай а: ЗавгаевгIар Докка, АслахановгIар Асланбек, ХасбулатовгIар Руслан, Боканаькъан Хьажбийкар, Малсаганаькъан Арсмак, Къоастой Беслан, Ибрагимбейли Хаджи-Мурат, кхыбараш.
Вай мехкахочо хьийга къа Iаьдало ца зувш дисадац. Из вар «ГIалгIай Республикан гIорваьнна хьехархо», цунна еннаяр вай къаман эггара езагIа лоархIаш йола «КарагIдаьннарех» яха орден.
Кхелхав Ужахьанаькъан Руслана (Расухана) Iамархан 2006 шера, ший 67 шу даьннача хана.