Кицаш

Моаршал дувхарга хьежжа хатта, накъа хьаькъалга хьежжа ваккха.

Саг везвер цун цӀи яц, цӀи езъер из саг ва.

Саг дика вовз, Ӏа цунца дукха сискал йиаяле.

ЦӀенавар цӀеро а воагавуц, бӀехавар хиво а цӀенвуц.

Зизашта аре еза, адамашта паргӀато еза.

Дошлорг

Шедолг (я) - свирель
Чайтоанг (я) - медвежонок
Неш (я) - подруга
ЦIокъ (да) - тигр
Тума (да) - десять рублей, червонец

Боканаькъан Къурейша Мустафа

ГIалгIай къаман кагийча наха юкъе, вайна ца а ховш, дукха денал дола, тIема говзал караерзаяь эпсараш хиннаб. Царех дуккхачар цIераш яйзар вайна, Украине СВО дIайолаенначул тIехьагIа. Царна юкъе ва тахан Россе Турпала дошо седкъаца белгалваьккха пхиъ зIамига саг. Хала хете а, царех цаI мара вайна юкъе вац, виънена турпала цIи еннай, «валарца» яха дош тIа а тохаш. Царех цаI ва Боканаькъан Къурейша Мустафа.

 Денал дола вай мехкахо ваь хиннав 1986 шера маьцхали бетта 23 дийнахьа МагIалбика кхален  СоагIапча оалача юрта.  2003 шера чакхйоаккх цо ше деша ваьгIа ишкол, цу хана денз Россе сийлахьча эскара мугIарашка волаш хьавенав. Юххьанца из деша отт Москверча лакхарча  командни  тIема училище, из толамца чакхйоаккх 2007 шера. ДIахо Мустафа амал де хьожаваь хиннав Къилбаседа Кавказерча тIема куран даькъ тIа. Цига 2016 шерга кхаччалца цо тIема гIулакх дIахьу мотоиччархой бригаде, из дIаяьккхачул тIехьагIа, цох йисача 42-ча дивизе гIулакх деш хул вай мехкахо. 

 Мотоиччархой взвода командирагара дIаволавенна, мотоиччархой 71-ча батальона командир хул цох. ТIема гIулакх дика довзаш, дIахьош вола зIамига саг дикка лакхлуш хиннав тIема дарже. ЗIамагIа волча лейтенантагара дIаволавенна, эскара подполковникага кхаьча хиннав из. Инаралга кхача цхьа-ши гIа мара биса хиннабац цун эпсара новкъа. ТIема наькъо из кхийлав Нохчий Республике, ГIирме, 2022 шера денз Къурейша Мустафа дакъа лоацаш хиннав Украине дIахьош йолча СВО. 

 Денал долча эпсара денна хиннад дукха паччахьалкхен совгIаташ, царна юкъе я Къонахчала орден, «Майралах» йола майдилг, «ТIема гIулакх дика дIадахьарах»,  «ТIема амал тIехдика дарах» яха майдилгаш, кхыяраш. 2023 шера Российски Федераце Президента Путин Владимира Амарца Боканаькъан Мустафайна лу РФ Турпал яха еза а йоккха а цIи, тIехьара (валарца) яха дош тIатехе.

 Подполковник Боканаькъанвар Украинерча тIема юкъе массехказа човнаш яь вар, хIаьта 2023 шера маьтсела бетта 15 дийнахьа тIема декхар кхоачашдеш, цун валар хилар Украине. Из дIавеллав ше кхийнача юртарча СоагIапчарча кашамашка. 

Мехка вицлургвац ший турпал. Карарча хана цун цIи лелаеш я СоагIапчара №30 йола юкъера ишкол, цун вахарах а тIема гIулакхех а даьккхад документальни кино. 2025 шера Ставропольски края Шпаковски кхален Михайловск яхача шахьар тIа оттадаьд вай мехкахочоа хетадаь сийленг. Цо дийшача тIема училище хьайийллай цун цIерах йола дешара класс. Дукха кхетаченаш хиннай цунна хетаяь ишколашка,  кагирхой дешаш болча кхыча моттигашка. ХIаьта цун дезалга бIарглокхаш, цунна эшар лоаттадеш я вай паччахьалкхе.   Боканаькъан Мустафай дисад кхо бер, сесаг.