Цу хана Мухьмад а со а, цхьа шу мара юкъе ца долаш (из сол цхьа шу зIамагIа вар), кхувш доагIар Наьсаре. ХIанзарчох вIалла тара яцар из шахьар цу хана; сатийна яр, адам а машин а дукха яцар, дукхагIа бола цун бахархой шоайла бовзаш бар. Цудухьа Мухьмад а цул воккхагIа хинна Беслан а дика бовзар цу ханарча къонабарашта. 

Iазе Мухьмад ваьвар 1959 шера наджгоанцхой бетта 26-ча дийнахьа Наьсаре. Уж гаргагIа бахар Наьсарерча №2 йолча ишколанна, хIаьта а цул боккхагIбараш цар дезалера дешаш хилар шахьар тIарча №1 йолча ишколе, масала, белггала дагадоагIа сона лакхе хьоахаваь Беслан цига дешаш хинна. 1975 шерга кхаччалца вахаш а дешаш а Наьсаре хиннав Мухьмад. Спортаца хьоашал леладе волавелча, цун цIи геттара сиха гIорйоалаш йоагIар вай мехка. Эггара хьалха доккхий толамаш даха волавеннача спортсменех вар ала мегаргда из майрра. Iоахарганаькъан  ГI. цIерагIча завода повала чу дзюдо секци хьайийлла воаллача тренера Мерешканаькъан Яхььяй секце аха волавеннавар Мухьмад.  

Цу шера из ваха а, деша а, ший спортивни говзал дIахо лакхъе а дIавода АьдагIий столице Майкопе. Цигара хьалаш, шеко йоацаш, вайцигарчарел дикка эргаш а дикагIа а хиннад. Вайцига-м хIама мича яр готта подвали цу чу уллаш массехк спортивни мотти мара. ХIаьта а тренер дика хиларо дукха хIама Iомадаьдар цунна, цIагIа волаш. Мухьмад деша отт цигарча хьехархой институте, хIанз цун тренер хул Валентин Ибрагимович Шхалахов. Цунца волаш, тамаш йилла доккхий толамаш доах къонача спортсмена. 1981 шера Минске дIахьош хиннача СССР чемпионате котало йоаккх цо. Кхы а цхьа шу даьлча, 1982 шера, из санна йола котало йоаккх цо Кишинёв оалача шахьар тIа, хIанз цох хул Советски Союза шозза чемпион.   Цу шера Мухьмада аьттув боал Германерча Росток яхача шахьаре хиннача Европа чемпионате дакъа лаца, цига вай мехкахочо борза майдилг йоаккх. ХIаьта ардара бетта тоабаш къовсаеннача Милане цунга дотув кхоач. Мухьмад вар СССР дунен халкъашта юкъерча класса спорта мастер, кхы дукха а доккхий а толамаш даьха, гIалгIай спортивни сий геттара айдаь хургдар цо, зуламхочун кулгах Iоажал нисъеннаецаре. Мухьмад кхелхар 1985 шера, герз кхетар бахьан долаш.

Мехкахошта из цIаккха вицлургвац, цох бола дагалоаттам бахаш ба. Цунна еннай «КарагIдаьннарех» яха орден, цун цIи лелаю Наьсарерча цхьан урамо, 2003 шера Магасерча стадиона тIачIоагIъяьй воккхача спортсмена цIи. Мехка чакхйоах цун цIерца ювзаенна дзюдох йола яхьаш.