Цкъа Магасе водаш вар со. Шахьара тIабодача наькъа йистте  со латташ, йоккха иномарка сецар.

- Магасе воагIий хьо? – хьакхайкар водитель.

- ВоагIа, даьра,- аьнна, чухайра со машина чу. Новкъа доагIаш, малав, малагIча тайпан ва хаьттар аз, юкъера ха хила мегача къонахчунга.

- Тиймарзанаькъан ва со, - аьлар цо, цхьа ха яьннача гIолла,-Ислам яха боксёр хезавий хьона?

- Хезав, мишта хезавац? Сона дукха гаьна воацаш, Магасе вахар из, - аьлар аз.

- Цун да ва со, - аьлар водитела, со цецвоаккхаш. 

Тамаш йир аз, сел къона волча даь иштта дуненна цIихеза воI хиларах.

- Хьо-м тIаккха са даь цIерхо хила везаш ва, са да а хиннав Яхьья яхаш...

Дагавийхар сона Ислам, цо яьха коталонаш. Из вар  боксах вола Россе спорта мастер, 2006 шера Европа чемпион, кхувш боагIарашта а  кагирхошта а юкъера Европа чемпион, Россе 2004 шера чемпион,  2005 шера дунен Кубок яьккхаяр цо, 2006 шера дунен кубок яккха дагахьа латарашца финале кхаьчавар,  дукха коталонаш яьхаяр дунен тайп-тайпарча, йоккхача гIалашка, Америкерча Чикаго дунен чемпионате борза майдилг яьккхаяр цо 2007-ча шера.  Дакъа лоацаш хиннавар 2008 шера Китае (Пекине) хиннача  Олимпийски ловзарашка.

Цигара из цIавена дукха ха ялале дар из, Магасера Эккажкъонгий-Юрта гIолла йодача автобусаца Наьсаре водаш вар со. Эккажкъонгий-Юртагахьа  автобус  Iоластача хана, цхьан кхалсага аьлар, шийца къамаьл деш ягIачунга, цу дIарча сурта тIара вар ва-кх са воI. Истий къамаьлашка дукха ладувгIаш оамал сай еце а, дIахьежар со остановка юххе доаллача доккхача суртага, Тиймарзанаькъан Ислам вар цу тIара гуш хиннар. Цу хана а тамаш йир аз, иштта къонача наьна воI Ислам хиларах. Вешта аьлча, Яхьья а цун фусам-нана а шаккхе ираз долаш нах ба аьнна хет сона, хIана аьлча цу тайпара воI хьалкхеве цар низ дIакхачарах. ТIехьарча хана Ислам, араваьнна, коа волавенна лелаш, гора сона. ДегIа цхьа оагIув дикка лелаш боацаш санна хийтар сона цун. Дукха ха ялале, из вайцара къаьстав яха ийрча хоам а хезар.

Яхььяй Ислам кхелхав 2015 шера маьцхали бетта 31 дийнахьа. Цун ши йоI я.