Бера хана хулаш ма хиллара, цхьацца лакхара уйлаш яр цун. Инженер-изобретатель хила лаьрхIа лелаш волча цунца, цхьан дийнахьа цу хьакъехьа лаьрххIа къамаьл ду дас.  Вешта аьлча, цо дIахайтар воIа ший лоIам миштаб. Ахьмадах лор хиларга сатувсаш вар из. Лорий дешар дийша веце а, кулг дарбане долаш, цхьацца говзал йолаш хиннав Соси ше а.  

1946 шера хиннад из. Дас цхьа хьехар ду кIаьнка. Цо яхачох, вIаштта кхаь шера бIаьстан юхье бIехала цIока, бисмал а даьккха, кулгашка хьокхае езаш вар из. Цу тайпара хIама дича, лорал доаллаш дола кулг аьттув болаш хул оалар. 1959 шера берригача мехка боаржабаь, шерра дIахьош хиннаб профориентацеца бувзабенна болх. Шийна езаш йола балха говзал харжа йиш йолаш хиннав хIара. Цу хьакъехьа воI дагавоал наьнаца, хIаьта тIеххьарчо дагабохийт даь лоIам. Иштта вода вай мехкахо лорий дешар деша. Юххьанца, 1956 шера, Алма-Ате; цул тIехьагIа, 1957 шера, Буро тIа дешаш хул из. Дийша ваьлча, зIамига саг эггара хьалха Наьсаре кхаьчар. Дика лораш кIезига хиннаб цу хана вайцига. Бакъдар аьлча, уж дукхагIа хилийтара сагота волаш саг а хиннавац. Буро чурча больницен коа ваха моттиг лу къонача специалиста. Юххьанца цох хул хирург. Ахьмада дийнахьа 2-3 сахьата болх бе безар поликлинике. Из Наьсаре яр. Цигара ваьлча, гIаш Буро чу водар, сахиллалца болх беш хулар цигарча больнице. Иштта лелаш-хьувзаш, цунга хоам боагIа Ленинграде онкологех йолча ординатуре вахийта таро хиларах. Шин шера хила везар цига. Ше цига яьккхача хана, из Iомавелар наха юкъе лелача, цIийоацар оалача лазарашта дарбаш де.  Иштта кхоач из Шолжа-ГIалий тIарча №2 йолча дарбанчен онколога дарже.

1985 шера онкологе отделени хьаелл Шолжа-ГIалий тIарча 9-ча дарбанче, хIаьта вай мехкахо цунна керте а оттаву. Цунца цхьана цох ву НГIАССР унахцIенон министерствон керттера онколог. Цо хьийга къа  теркал а деш, 2002 шера цунна елар «КарагIдаьннарех» оала вай республикан орден, кхы а ши шу даьлча «ГIалгIай Республикан гIорваьнна лор» яха цIи лу цунна. ТIаккха цун совгIаташ тIа IотIакхийтар «Россе гIорваьнна лор» яха цIи а. Куштанаькъан Ахьмад вар респбликан дарбанчен  онколог, онкологически диспансера лор. Медицински факультете деша багIарашта диагноз оттаяр кердача  хьисапе хьехаргдола болх беш хиннав из укх тIеххьарча шерашка. Цу лостамагIа къахьегача лорашта эшаргдола книжка а, из дIа мишта хьеха деза дувца методически кулгал а яздаьд цо.

 Кхелхав Сосе Ахьмад 2025 шера тов бетта, ший 90-гIа шу долча хана.