Оалаш да, саг вовзийтараш цун дика гIулакхаш да, аьле. Цунна тешал деш хургда тахан са вувца безам болча сагах дола ер йоазув. Из ва Марзенаькъан  Хьусена Висангири. Из ваь хиннав 1940 шера ардара бетта 31-ча дийнахьа Буро тIа, Марзенаькъан Хьусенеи Сурхой (Йовлой) Маремеи дезале. Вай мохк бохабеш, кIаьнк диъ шу даьнна мара хиннавац, вешта аьлча, хиннар кхетаде а цун уйла е а маггал ха яьнна хиннавац из цу заман чухь. Цар дезал баьхаб Къилбаседа Казахстанерча Смирновка яхача станце. Шийла мохк хиннаб из. Виъ воIи цхьа йоIи хиннад Марзенаькъан Хьусена. Дезала юкъе эггара зIамагIа Висангири хиннав. Итте а класс Казахстане  яьккхай цо. Мохк юха меттаоттабича, 1959-ча шера из деша отт хьехархой институте, хIаьта 1963-ча шера из толамца чакх а йоаккх цо.  Ший къахьегама никъ Висангире дIаболабу Наьсарен кхален газета редакцера. Цу редакце волаш, цо даь йоазош теркам тIаозаш хул Шолжа-ГIалий тIа арадувлаш хиннача къаман юкъарча а парте обкома доалахьарча а «Сердало» яхача газета кулгалхой. Цига балха дIаэц къона журналист. Цу хана дIахайт цо газет дешарашта, ше эрсий мотт дика ховш, цунах кхеташ, цу меттала язде ховргдолаш хилар. Из бахьан долаш республикан кагирхой «Комсомольское племя» яхача газете къахьега вех из. ДIахо цо болх бу лоалахарча ХIирий республикан «Къона коммунист» яхача кагирхой газете.

1968-ча шера Марзенаькъан Висангири дIаэц СССРа журналистий Союзе. 1973 шера Нохч-ГIалгIай министрий Совете балха хьех из. Юххьанца инструктор а, цул тIехьагIа вахарца-культураца ювзаеннача отдела кулгалхо а хул цох. Сона дагадоагIа, 80-ча шерашка нохчий а гIалгIай а боккхагIбола йоазонхой берий журнал («СелаIад», «СтелаIад») хьаде гIерташ лийнна. Эггара чIоагIагIа цу гIулакха къахьийгараш бар Марзенаькъан Висангири, гIалгIай халкъа йоазонхо Чахкенаькъан СаIид.  

Вайна ховча беса, 90-ча шерашка йох йIаьххача хана Нохч-ГIалгIай АССР оалаш хинна республика. ГIалгIай мехка пенсионни фонд эггара хьалха хьаяьр, цу чу болх бергбола нах вIашагIтехар, цар болх толамца дIа а болабаь, цунна кулгал даьр Хьусена Висангири вар. Цу гIулакхах дика лоархIавеш, диъ шера РФ Пенсионни фонда чуйоагIача ГIалгIайче гIолла йолча отделене кулгалхо (управляющи) хул цох. Из болх дика вIаштIехьбаьккха волча вай мехкахочох ГIаьбартой-Балкхарой республикерча (Нальчикерча) пенсионни отделене кулгалхочун заместитель хул. Цига цо къахьег кхаь шера (1996 – 1998). 2004 шера денз, из вар «Россе пенсионерий Союз» яхача мехка  юкъарча организаце доакъашхо.

Марзенаькъан Висангире дика дезал а бар. Цун фусам-нана яр Буро чура больница хьалъяь волча лора-терапевта Долтмарзанаькъан Сулейма йоI Зина.  Висангиреи Зинаси бакъахьара тIехье кхеяьй. Цар воI-йоI – ИбрахIими Тамараи  –   да.

Таханарча дийнахьа Марзенаькъан Висангири вайца вац. Могаш воацаш дикка ха яьккхачул тIехьагIа, из кхелхав 2011-ча шера.