Вай къаман ашарий дунен тIа бе-беча ханашка цIихеза, йоккха говзал йолаш нах хиннаб. Царех цаI хиннав Оздой Ислама Iамархан. Из  ваь хиннав 1955-ча шера Буро тIа. Цига дIайолаеннай цун дешара юхьиг,  тIаккха  Минеральные Воды оалача шахьар тIа деш цо ишкол яккхалца. Ший оаз дика дIайодилга ховш вола зIамига саг деша отт цигарча ашарий училище, из нийсделар 1972-ча шера. Кхы а цхьа шу даьлча, эскаре амал де вода. Эпсара дарж долаш, Баку  чакхдоаккх цо ший тIема гIулакх, бухсоццаш цох хул капитан. Ший ткъо шу даьннача заман чухь (1975), Хабаровск оалача шахьар тIарча искусствай училищен иллиалархой отделене деша отт вай мехкахо. Цигара дийша ваьлча, 1979 шера Хабаровскерча ашарий театре болх бе дIаволалу  из. ДIахора цун кхел цхьан юкъа ювзаенна хул Владивосток оалача гIалаца. ХIанз из деша отт цигарча хьехархой институте, иллеш доахача наьха говзал Iомае дагахьа. ВорхI шера (1990-1997)  къахьег  Хабаровскерча ашарий театре, ховш ма хиллара цхьацца оперни спектаклашка дакъа лоацаш хиннав из цу хана а цул тIехьагIа а. Цунца болх беш хиннай цун фусам-нана Мизерная Татьяна. Волгоградерча ашарий театре къахьега хьех уж шаккхе а, дIахо Ислама Iамархан ший Даьймехка кхоач. Наьсарерча оперни студе болх беш, дуккхача вайцига хулача концерташка дакъа лоац дезала дуэто (2001–2004). Цо вайцига къахьегаш яьккхача хана, моттигерча иллиалархошта цхьацца гIо-новкъостал ду цо ший хьехамашца, хIана аьлча цу хана из духхьал иллиалархо хинна ца Iеш, хьехархо а вар. 2003 шера Оздой Iамархана лу «ГIалгIай Республикан халкъа артист» яха цIи.

Арахьа волча хана а ший къам дагадоагIаш, цунна пайдане хургдар де гIерташ хьавоагIа из. Масала, 2005 шера цо вIашагIйолл «ГIалгIайче» яха Волгоградера  юкъарло, цун керте латташ дикка ха а йоаккх. Из болх цо тарбора Волгоградерча музыкальни комеде театра артиста гIулакхаца. Хьехархо хиларах тарра, цигарча искусствайи культурани паччахьалкхен институте къа а хьегар Iамархана, иллиалархой къона ноахалаш кхедеш.  ХIаьта 2010-ча шера денз, Ислама Iамархан вар вай республикан президента Волгоградски областе гIолла вола викал. Цун оаз, иллиалархочун говзал йовзаш яр доазол арахьарча мехкашка а. Из ше а вар каст-каста дунен бе-беча мехкашка водаш. Масала, из хиннавар США, Японе, Итале, Корее, Китае, Швейцаре, Германе.  Цо дакъа лаьцад дунен йовзаш йолча оперни спектаклашка. Цо ловзаяьй Альфреда («Травиата»), Паччахьа Густава III-чун («Бал-маскарад»), Базилио («Фигарос саг йоалаяр»), Эдвина («Сильва»), Данилай («Сакъердаме жеро»), Айзенштейна («Iимаьшк»). ГIалгIай меттала дIааьннадар цо Осменаькъан  Хьамзата байтах дола «Даьймохк дагаухар сона» яха илли.

Оздой Ислама Iамархан кхелхав 2015 шера, ший 60 шу даьннача хана.