Дзейтанаькъан Хьусена Хьажбикар ваь хиннав 1939-ча шера оагIой бетта цхьоалагIча дийнахьа,  МагIалбика кхален Ачалкхе яхача юрта Дзейтанаькъан Индарбе Хьусенеи Аькхенаькъан Иналкъий Хазиханеи дезале. Сов хьалха да валар бахьан долаш, кхы бер хиннадац цар дезале, из цхьа кIаьнк воацар. Вай мохк бохабеча хана, пхи шу  даьнна хиннав Хьажбикар. ЦаI мара воацача цунна цу халача хана наьна йIовхал теачох тара да, хIана аьлча дукха бераш хилча, уж лораде хала хинна хургдар нанна. Уж баха бохийт Казахстана Талды-Кургански областа Андреевски кхален Андреевка яхача юрта. Ишколе деша а цига вода из. 1957 шера дикеи тIехдикеи дешаш чакхвоал вай мехкахо. ЦIадахка мукъа белча, цар дезал Шолжа-ГIалий тIа баха боагIа. Итт класс яьккха воаллаше а, Москверча полиграфически институте деша отт Хьажбикар. ХIаьта 1963 шера из чакх а йоаккх. Юха цIавоагIа из ший республике. Нохч-ГIалгIайчен культуран министерствонна чуйоагIача полиграфиздата производственни отдела керте оттаву хIетта институт яьккха зIамига саг. 1964-ча шера полиграфиздат дIайоаккх, хIаьта Хьажбикар балха хьожаву Министрий Совета чуйоагIача кепайоазонах йолча урхаллен керттера инженер волаш. 1972 шера цох хьаю  зарба тохарах, полиграфех, книжкаш дохкарах йола урхалле.  Цу балха тIа хул из 1976-ча шерга кхаччалца.

 1976-ча шера Хьусена Хьажбикар хьожаву И. Заболотне цIерагIча республикански типографе директоралла. Из болх 1983 шерга кхаччалца бу цо. Цо кулгал деча юкъа типографи котйийннай РСФСР кепайоазон предприятешта юкъе яьржача социалистически яхье, цунна тешал деш яр вай мехкахошта енна карара кара тела ЦIе байракх. 1980-ча шера типографе хьалхара моттиг йоаккх Шолжа-ГIалан Ленински кхален промышленни предприятешта юкъе. 1983 шера из хьожаву Нохч-ГIалгIай книжни издательствон директоралла, дIахо типографеца вIашагI а техе, цох хьаду «Книжка»  оала зарбан-полиграфически цхьанкхетар. 1993-ча шерга кхаччалца, цига директор волаш, къахьег цо. Советски кепайоазонца беркате болх барах, дуккха совгIаташ а сийлен грамоташ а тийннаяр Хьажбикара. Царна юкъе яр «Къахьегамца белгалвалар» (1981) яха майдилг. Из вар «Кепайоазон тIехдика болхло» (1977), журналистий Союза доакъашхо, полиграфе а издательствай Iилма-технически а хIарман председатель. 1990-ча шера Сийлахь-боккхача Даьймехка тIема доакъашхой йоакхо ярах, нах безаш, эздел долаш хиларах, сийлен грамота еннаяр цунна.

1965-ча шера денз, цунна уллув йолаш, вахар новкъост йолаш, чакхъяьннай цун фусам-нана Котаганаькъан Берснакъий Хаифа. Цхьана бахаш, Хьажбикареи Хаифаси кхоъ дезалхо кхеваьв: ши воIи йоIи - Асланбек, Адам, Аза. 

Дуккхача наха бохам боаккхаш, Дзейтанаькъан Хьусена Хьажбикар кхелхар 1993-ча шера, ший 54 шу даьннача хана.