ГIалгIай мехка эггара цIихеза болча нахах цаI вар аьнна хет сона езача атлетиках вола тренер хинна Коазой Iабибулата ИбрахIим. Из вар СССР спорта мастер, СССР гIорваьнна тренер, дунен халкъашта юкъерча категорех вола судхо. Цо кхебаьча штангисташта юкъе ба СССР, Европан, дунен, Олимпийски ловзарий чемпионаш, СССР спорта гIорваьнна 3 мастер, СССР спорта дунен халкъашта юкъерча классах вола 16 мастер, СССР спорта 200 мастер.
Коазой Iабибулата ИбрахIим ваь хиннав 1939 шера маьцхали бетта 20 дийнахьа Буро тIа. 1956 шера ишкол яьккха воал из. Цу хана деррига къам санна Сибре Iобигача баьхаб цар дезал а. 1957 шера республикан столице Шолжа-ГIалий тIа баха боагIа уж. Юххьанца цо болх бу токара гIулакх Iомадеш, цигара воаллаше ший лоIамагIа кIалкхетаргах латара секце ихав, спортацара хьоашал дезаш вола зIамига саг. ТIаккха кхыча секце, штангист хила ловш, къахьега волалу из. Цхьа шу далале, цох хул СССР спорта мастера кандидат. 1958-1961 шерашка эскаре гIулакх деш хул вай мехкахо. Цу 1961 шера хул цох СССР спорта мастер. ДIахо тренера никъ караэц цо, ше валлалца йолча хана цунна тешаме волаш хьа а воагIа. 1970-ча шера «Динамо» яхача ЦС хьалхале яккхара яхьашка цо кийчваьча нохч-гIалгIай 12 спортсменах СССР спорта мастераш хул. Цул тIехьагIа, ИбрахIим керте оттаву Шолжа-ГIалий тIа хьаяьча еза атлетика дегIайоалаеча центра. 1977-1990 шерашка из юкъевода СССР тренерий штабанна. Цу новкъа цо яьккхача халача урхенна дика тешал ду укх масало. Ший говзал дIаенна, воI санна хеташ, цо кхеваьча Арсмаканаькъан Исраилах вурийтта шу даьлча дунен халкъашта юкъерча классах вола мастер, кагирхошта юкъера дунен чемпион, СССР а дунен а кубок яьккхар, СССР дукхазза чемпион, дунен чемпион хиннав. ХIаьта 1988 шера боккха кхаъ хилар вай республикерча наха санна, берригача мехкарча адамашта. Сеуле хиннача Олимпийски ловзарашка ше санна болча дунен штангистел котваьлар из.
Кастта йоха йолаелар Нохч-ГIалгIай республика. Дуккха нах дIабаха безача кхаьчар Шолжа-ГIалий тIара. ДIавахар цигара ший дезалца ИбрахIим а, из ваха сецар Наьсарерча «ТIаргим» яхача моттиге. 1994 шера ГIалгIайчен хьалхарча президента Овшанаькъан Руслана амарах Сурхо тIа спортивни ишкол хьае мукъа беннабар. Кхы а цхьа шу даьлча, болх бе а спортсменаш кхебе а йолалу из. «Сурхо» яхача цун директор вар гIорваьнна хьехамча. Дикка спортаца хьоашал дола нах вIашагIтехабар ИбрахIима ше доал деча клубе.
Коазой Iабибулата ИбрахIим тахан вайца вац, из кхелхар 2024 шера ардара бетта 25-ча дийнахьа, бакъда цох бола дагалоацам даим вай дегашка бахаргба.