Гадаборшанаькъан  Боскара Осман ваь хиннав 1936 шера тушола бетта 22-ча дийнахьа, Гадаборшакъонгий-Юрта (Куртат), наха сий деш, лоархIаш болча дезале. Боскар  хиннав денал, яхь, къаман гIулакх керттерча моттиге увттадеш вола саг. Из дика гучадоал вайна, ТIой-Юрта  вахача Тирканаькъан Iадсалама журналистах даь «Правда» яхача газета собкор» («Сердало» 2017, № 86-87) яха йоазув Iодийшача. Хьож вай мишта ваьха саг хиннав Османа да: « Османа яхачох, дисача цхьаццадолча каьхаташа тешал дечох, цун да Боскар  1886 шера Питере ваха хиннав, заводе балха а волаш, болхлой Iаьдала раьза боацаш деча боламашка дакъа лоацаш хиннав, цигара цIавеначул тIехьагIа Къилбаседа Кавказе революцен гIулакх котдаккха гIерташ къахьийгад цо.  ГIалгIай революционни полка командира Орцханаькъан Хизара гIонча хиннав из. Тбилиси дIавода С. Орджоникидзе накъавоаккхаш а С. М. Киров вовзаш а хиннав. Граждански тIом болча хана Деникина гIаьрхошта духьала тIом беш, къаман юрташ лораеш лаьттав». 

Иштта Iадсалама бегалдаьккхад, Османа нана тайпан Леймой Бано яхаш хиннай аьнна а.

Вай Сибре дугача хана 10 шу даьнна, кхувш воагIаш кIаьнк хиннав из. Уж баха сайца хиннаб Казахстана Кокчетавски областа Щучинск яхача шахьар тIа. Цига яьккхай цо 9 класс, болх баьб грузчик, гIишлош еча моттигашка гIо-нокъостал деш, комсомольски болх лелабаьб. ТIеххьара итт класс вай цIадаьхкачул тIехьагIа, 1957-ча шера Шолжа-ГIалий тIа яьккха хиннай. ДIахо, Османа ше дийцачох, из деша отта ваха хиннав Iарбий метта факультете. Бакъда цу ханарча Iаьдало цох дипломат хулийтаргвоацилга хьахайт. Цул тIехьагIа ший каьхаташ журналистикан факультете дIа а деле, экзаменаш дика дIа а еле, деша дIаотт из. Дийша ваьлча «Грозненский рабочий» яхача газете балха хул. Цигара деша вохийт КПСС ЦКана чуйоагIача ХIарман Iилмай академе. Из яьккха воалаш, «Правда» оалача газете болх бе Iомалуш ха йоаккх. Цу хана цо даь йоазош бахьан долаш, цига болх бе вут Вологодски, Архангельски областашкара, Коми АССРа корреспондент волаш. Из цох боккха тешам  болар а цун балха говзала лакха мах бар а хиннад. Из я 1978 шергара денз 1983 шерга кхаччалца йола ха. Цул тIехьагIа из вера «Сердало» керттерча редактора балха тIа.

Редкатора сий журналисташта юкъе лакхдар санна хIама хилар Османа керда машин яларах. Хьалхара редактор лелаваь «Газ-24» дIаяьккха, наггахьарча хьакимга мара цу хана йоаца «Газ-3110» яха керда яьнна Iаьржа «Волга» елар цунна. Аз цунца болх беш яьккхача хана, цкъа мара ший фусам-нана Рукъет чуягIаш бIарговавнзар сона из. ХIаьта цун дезала  оамал яцар,  из волча балха хьаухаш, иштта цкъа вайра ерригача редакцена, ший кхувш воагIа кIаьнк уллув волаш из балха вена. Цу гIулакха эздел долаш, эсала хIама бIарга ца дайташ саг вар керттера редактор. 

Боскара Османа Нохч-ГIалгIай а Нохчий а республикай паччахьалкхенашка болх баьбар. Из вар СССР журналистий Соза доакъашхо.  Кхелхав 2020-ча шера маьтсела бетта.