Малсаганаькъан Йоакъапа Ювсап

Тхо Наьсарерча №1 йолча ишколан дукха гаьна доацаш дахар. 1974 шера керда директор вайтар тхона. Из вар хьалха Наьсарерча №2 йолча ишколе хьехархо а директор а волаш  болх баь саг. 1968-1974 шерашка  райОНО кулгалхо хиннавар Малсаганаькъан Йоакъапа Ювсап. Тхо, итт класс яьккха, дIадахар 1975 шера. Цул тIехьагIа, кхы а итт шера цигарча хьехархошта керте лаьттар из. 1986 шера Йоакъапа Ювсап хьожаву Наьсарен кхален  хьехархой профсоюзашта кулгалде. 1993 шера республикан халкъа дешара болхлой профсоюзашта керте отт. Вешта аьлча, профсоюзашца бувзабеннача балха тIа 27 шера къахьег къаьнача, вахар, нах дика байзача хьехархочо. Цига волаш кхелхар из. Цунца болх баь, цо дуккхаза хьехараш деш,  къахьега Iомабенна нах  бар цун гIулакх дIахохьораш. Ювсап царна мишта дагавоагIа хьежар со.  Йовлой Заремас аьлар: «Из тха дагахьа висав; хьехар ду, нийсача наькъ тIа доаха, балха тIа гIо ду дá вусача тайпара. Хьехархой га доаккхаш, вайцигарча юрташка болх беча наха тIатохаш дола 25% дIа ца доаккхийташ, духьаллаьттар из вар. 2015 шу хьатIакхаччалца, вайцига юрташка бахача наха токахи газахи вIалла мах телацар, уж  ишколашка болх беш бале».

ХIара шера дикагIа вола хьехархо къоаставе хоаяьча кхела юкъе вар Ювсап; дешара министр Тенкенаькъан И., университета хьехархо Жеребило Т., халкъа гуллама депутат Амренаькъан М., кхыбараш санна.  

Эггара тIехьа Йоакъапа Ювсап сона вайра «Фабрика» оалача базар тIа. УнахцIено дукха хестаеш, дика я оалаш вацар из цу хана. Цул тIехьагIа дукха ха ялале, из кхелхав аьнна хезар сона. Къаьнаръяр дIа а яьккха, кердача хьисапе хьалъяьй Наьсарера №1 йола юкъера ишкол.  Малсаганаькъан Ювсапа цIерах я из. 

Iаьдала а наха а накъаваьнна саг из хиннилга ха йиш я, цунна тайп-тайпарча ханашка  деннача паччахьалкхен совгIатех. Дерригаш ца доахе а, цхьадараш белгалдоахаргда вай царех. 1966 шера Малсаганаькъан Ювсапа лу «Сийлен белгало» яха орден; кхы а кхо шу даьлча, 1969 шера, «РСФСР халкъа дешара тIехдика болхло» хул цох; 1972 шера цунна лу «РСФСР гIорваьнна хьехархо» яха цIи; 1983 шера «Нохч-ГIалгIай АССР гIорваьнна хьехархо» хул цох; 2002 шера «КарагIдаьннарех» яха орден лу Ювсапа, хIаьта 2011 шера «Россе профсоюзий  гIорваьнна болхло» хул. Белгалдаккха деза, 1986 шера паччахь хиннача Б. Н. Ельцина цунна совгIата сахьат дайта хилар а.  

Ювсапа кхеваьв виъ дезалхо: ши воIи ши йоIи – Хьасан, Хьусен, Зарема, Хадчат.

Из вайцара къаьстав 2012 шера оагIой бетта 25 дийнахьа. Ювсап дIавеллав Мочкъий-Юртарча шоай тайпан нах боахкача кашамашка.