Мухьмад ваь хиннав 1952 шера ТIоаршхой Ахьмадеи Патанаькъан СаIад-молла Хьалиматеи дезале. Эггара хьалха цар дезале хиннав воI Мухьмад. Цул тIехьагIа кхы а кхо йоI: Лида, Лиза, Лема; виъ воI: Муса, Борис, Батарбик, Джабраил  баьхкаб дунен чу.

Вай Сибрера цIадаьхкачул тIехьагIа, Буронна дукха гаьна йоацаш иллача Южни яхача моттиге баха совц цар дезал. Ишкол а цига яьккхай цар. ХIаьта из яьккхачул тIехьагIа, воккхагIа вола Мухьмад, цхьан хана ший дас санна, мехкадаьтта институт яккха ловш хиннав. Мухьмада аьттув боал М. Д. Миллионщикова цIерагIча, къаьнарча а мехка дика лоархIаш йолча а Шолжа-ГIалий тIарча института промыслови оалача факультете деша отта. 1975-ча шера,  институт яьккха ваьлча, гаьнарча Камчатке къахьега дIахьожавайт цо ше.

Цига из болх бе дIаволавенна хиннав  бурувдеттачун гIонча волаш, тIаккха бурувдеттар хиннав цох, дIахо цхьан балха даькъа кулгалде оттаваьв, цигара мехкдаьтта а газ а лохача Камчаткерча  экспедицена керте лаьттав. Йоккхача, тохкам беча геологий компане директор а хиннав из. 2006 шера «Стройгаз» яхача ООО хьакимал даьд, хIаьта 2011 шера из доал де хьожаву «Камчатбургеотерми» яхача ГУПа. Камчаткера промышленни газ лахар из юкъе волаш хиннад. Цун толамех лаьца дика дувц паччахьалкхен совгIаташа, царна юкъе да: «Россе лаьттан кIоаргений сийдола тохкамхо», «Камчаткан геологически гIулакха ветеран», Камчатски областа кулгалхой сийлен грамота, «Меценат» яха орден. Цо болх баьча Елизоверча  моттиге, цох болча дагалоаттама улг хьалтехад. Цул совгIа, йиший-йоIа Розас яхачох, Камчатке бIарчча урам ба цун цIи лелаеш.

 Цун фусам-нана я Озанаькъан Руслана Роза. Ашарий дешар дийшача цо ваь воI Руслан, йоI Аза да цар. Карарча хана воI юридически, гIишлонхой дешараш дийша ва. Из Америке вах. Азас нанас санна ашарашца дувзаденна дешар дийшад, из а ший воша вахача доазол арахьарча мехка ях.

1992 шера гIалгIай-хIирий тIом хинначул тIехьагIа, вахарах еха ший йиша Лида а цун дезал а ше волча Iобуг цо. Цох лаьца «Вай йовхьамаш» яхача журнала тIа яздаьдар Севрюкова Еленас. Кхаь шера бах Лидай дезал Камчатке, цул тIехьагIа цIабоагIа, баха совц Наьсарерча Камазцентр оалача моттиге.  Йиший берашка дешийт наьна-вошас. Вожаш цIабаьхкача а, царех цаI, Махьмуд,  шийца вут. Из цига болх беш вар прокурора гIонча волаш. Мухьмад кхелхав 2013 шера. Из дIавеллав Мочкъий-Юртарча ТIоаршхой тайпан кашамашка.